17. සත්තරසමවග්ගො

(174) 9. න වත්තබ්බං සඞ්ඝස්සදින්නං මහප්ඵලන්තිකථා

797. න වත්තබ්බං – ‘‘සඞ්ඝස්ස දින්නං මහප්ඵල’’න්ති? ආමන්තා. නනු සඞ්ඝො ආහුනෙය්‍යො පාහුනෙය්‍යො දක්ඛිණෙය්‍යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්සාති? ආමන්තා. හඤ්චි සඞ්ඝො ආහුනෙය්‍යො…පෙ… අනුත්තරං පුඤ්ඤක්ඛෙත්තං ලොකස්ස, තෙන වත රෙ වත්තබ්බෙ – ‘‘සඞ්ඝස්ස දින්නං මහප්ඵල’’න්ති.

න වත්තබ්බං – ‘‘සඞ්ඝස්ස දින්නං මහප්ඵල’’න්ති? ආමන්තා. නනු චත්තාරො පුරිසයුගා අට්ඨ පුරිසපුග්ගලා දක්ඛිණෙය්‍යා වුත්තා භගවතාති? ආමන්තා. හඤ්චි චත්තාරො පුරිසයුගා අට්ඨ පුරිසපුග්ගලා දක්ඛිණෙය්‍යා වුත්තා භගවතා, තෙන වත රෙ වත්තබ්බෙ – ‘‘සඞ්ඝස්ස දින්නං මහප්ඵල’’න්ති.

798. න වත්තබ්බං – ‘‘සඞ්ඝස්ස දින්නං මහප්ඵල’’න්ති? ආමන්තා. නනු වුත්තං භගවතා – ‘‘සඞ්ඝෙ, ගොතමි, දෙහි, සඞ්ඝෙ තෙ දින්නෙ අහඤ්චෙව පූජිතො භවිස්සාමි සඞ්ඝො චා’’ති [ම. නි. 3.376]. අත්ථෙව සුත්තන්තොති? ආමන්තා. තෙන හි සඞ්ඝස්ස දින්නං මහප්ඵලන්ති.

න වත්තබ්බං – ‘‘සඞ්ඝස්ස දින්නං මහප්ඵල’’න්ති? ආමන්තා. නනු සක්කො දෙවානමින්දො භගවන්තං එතදවොච –

‘‘යජමානානං මනුස්සානං, පුඤ්ඤපෙක්ඛාන පාණිනං;

කරොතං ඔපධිකං පුඤ්ඤං, කත්ථ දින්නං මහප්ඵලන්ති.

‘‘චත්තාරො ච පටිපන්නා, චත්තාරො ච ඵලෙ ඨිතා;

එස සඞ්ඝො උජුභූතො, පඤ්ඤාසීලසමාහිතො.

‘‘යජමානානං මනුස්සානං, පුඤ්ඤපෙක්ඛාන පාණිනං;

කරොතං ඔපධිකං පුඤ්ඤං, සඞ්ඝෙ දින්නං මහප්ඵල’’න්ති [සං. නි. 1.262; වි. ව. 642, 751].

‘‘එසො හි සඞ්ඝො විපුලො මහග්ගතො,

එසප්පමෙය්‍යො උදධීව සාගරො;

එතෙ හි සෙට්ඨා නරවීරසාවකා [නරසීහසාවකා (ක.)],

පභඞ්කරා ධම්මමුදීරයන්ති.

‘‘තෙසං සුදින්නං සුහුතං සුයිට්ඨං,

යෙ සඞ්ඝමුද්දිස්ස දදන්ති දානං;

සා දක්ඛිණා සඞ්ඝගතා පතිට්ඨිතා,

මහප්ඵලා ලොකවිදූන වණ්ණිතා.

‘‘එතාදිසං යඤ්ඤමනුස්සරන්තා,

යෙ වෙදජාතා විචරන්ති [විහරන්ති (සී. ක.)] ලොකෙ;

විනෙය්‍ය මච්ඡෙරමලං සමූලං,

අනින්දිතා සග්ගමුපෙන්ති ඨාන’’න්ති [වි. ව. 645, 754].

අත්ථෙව සුත්තන්තොති? ආමන්තා. තෙන හි සඞ්ඝස්ස දින්නං මහප්ඵලන්ති.

න වත්තබ්බං සඞ්ඝස්ස දින්නං මහප්ඵලන්තිකථා නිට්ඨිතා.