17. සත්තරසමවග්ගො

(175) 10. න වත්තබ්බං බුද්ධස්සදින්නං මහප්ඵලන්තිකථා

799. න වත්තබ්බං – ‘‘බුද්ධස්ස දින්නං මහප්ඵල’’න්ති? ආමන්තා. නනු භගවා ද්විපදානං අග්ගො, ද්විපදානං සෙට්ඨො, ද්විපදානං පමොක්ඛො, ද්විපදානං උත්තමො, ද්විපදානං පවරො අසමො අසමසමො අප්පටිසමො අප්පටිභාගො අප්පටිපුග්ගලොති? ආමන්තා. හඤ්චි භගවා ද්විපදානං අග්ගො, ද්විපදානං සෙට්ඨො, ද්විපදානං පමොක්ඛො, ද්විපදානං උත්තමො, ද්විපදානං පවරො අසමො අසමසමො අප්පටිසමො අප්පටිභාගො අප්පටිපුග්ගලො, තෙන වත රෙ වත්තබ්බෙ – ‘‘බුද්ධස්ස දින්නං මහප්ඵල’’න්ති.

න වත්තබ්බං – ‘‘බුද්ධස්ස දින්නං මහප්ඵල’’න්ති? ආමන්තා. අත්ථි කොචි බුද්ධෙන සමසමො – සීලෙන සමාධිනා පඤ්ඤායාති? නත්ථි. හඤ්චි නත්ථි කොචි බුද්ධෙන සමසමො – සීලෙන සමාධිනා පඤ්ඤාය, තෙන වත රෙ වත්තබ්බෙ – ‘‘බුද්ධස්ස දින්නං මහප්ඵල’’න්ති.

න වත්තබ්බං – ‘‘බුද්ධස්ස දින්නං මහප්ඵල’’න්ති? ආමන්තා. නනු වුත්තං භගවතා –

‘‘නයිමස්මිං වා ලොකෙ පරස්මිං වා පන,

බුද්ධෙන සෙට්ඨො ච සමො ච විජ්ජති;

යමාහුනෙය්‍යානං අග්ගතං ගතො,

පුඤ්ඤත්ථිකානං විපුලප්ඵලෙසින’’න්ති [වි. ව. 1047].

අත්ථෙව සුත්තන්තොති? ආමන්තා. තෙන හි බුද්ධස්ස දින්නං මහප්ඵලන්ති.

න වත්තබ්බං බුද්ධස්ස දින්නං මහප්ඵලන්තිකථා නිට්ඨිතා.