(173) 8. න වත්තබ්බං සඞ්ඝො භුඤ්ජතීතිකථා

795. න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්තීති? ආමන්තා. හඤ්චි අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්ති, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.

න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු වුත්තං භගවතා – ‘‘ගණභොජනං පරම්පරභොජනං අතිරිත්තභොජනං අනතිරිත්තභොජන’’න්ති? ආමන්තා. හඤ්චි වුත්තං භගවතා – ‘‘ගණභොජනං පරම්පරභොජනං අතිරිත්තභොජනං අනතිරිත්තභොජනං’’, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.

න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු අට්ඨ පානානි වුත්තානි භගවතා – අම්බපානං, ජම්බුපානං, චොචපානං, මොචපානං, මධුකපානං, [මධුපානං (සී. ස්‍යා. කං. පී.) මහාව. 300 පන පස්සිතබ්බං] මුද්දිකපානං, සාලුකපානං, ඵාරුසකපානන්ති? ආමන්තා. හඤ්චි අට්ඨ පානානි වුත්තානි භගවතා – අම්බපානං, ජම්බුපානං, චොචපානං, මොචපානං, මධුකපානං, මුද්දිකපානං, සාලුකපානං, ඵාරුසකපානං, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.

796. සඞ්ඝො භුඤ්ජති පිවති ඛාදති සායතීති? ආමන්තා. මග්ගො භුඤ්ජති පිවති ඛාදති සායති, ඵලං භුඤ්ජති පිවති ඛාදති සායතීති? න හෙවං වත්තබ්බෙ…පෙ….

න වත්තබ්බං සඞ්ඝො භුඤ්ජතීතිකථා නිට්ඨිතා.