(171) 6. න වත්තබ්බං සඞ්ඝො දක්ඛිණං පටිග්ගණ්හාතිකථා

791. න වත්තබ්බං – ‘‘සඞ්ඝො දක්ඛිණං පටිග්ගණ්හාතී’’ති? ආමන්තා. නනු සඞ්ඝො ආහුනෙය්‍යො පාහුනෙය්‍යො දක්ඛිණෙය්‍යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්සාති? ආමන්තා. හඤ්චි සඞ්ඝො ආහුනෙය්‍යො පාහුනෙය්‍යො දක්ඛිණෙය්‍යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්ස, තෙන වත රෙ වත්තබ්බෙ – ‘‘සඞ්ඝො දක්ඛිණං පටිග්ගණ්හාතී’’ති.

න වත්තබ්බං – ‘‘සඞ්ඝො දක්ඛිණං පටිග්ගණ්හාතී’’ති? ආමන්තා. නනු චත්තාරො පුරිසයුගා අට්ඨපුරිසපුග්ගලා දක්ඛිණෙය්‍යා වුත්තා භගවතාති? ආමන්තා. හඤ්චි චත්තාරො පුරිසයුගා අට්ඨ පුරිසපුග්ගලා දක්ඛිණෙය්‍යා වුත්තා භගවතා, තෙන වත රෙ වත්තබ්බෙ – ‘‘සඞ්ඝො දක්ඛිණං පටිග්ගණ්හාතී’’ති.

න වත්තබ්බං – ‘‘සඞ්ඝො දක්ඛිණං පටිග්ගණ්හාතී’’ති? ආමන්තා. නනු අත්ථි කෙචි සඞ්ඝස්ස දානං දෙන්තීති? ආමන්තා. හඤ්චි අත්ථි කෙචි සඞ්ඝස්ස දානං දෙන්ති, තෙන වත රෙ වත්තබ්බෙ – ‘‘සඞ්ඝො දක්ඛිණං පටිග්ගණ්හාතී’’ති. නනු අත්ථි කෙචි සඞ්ඝස්ස චීවරං දෙන්ති…පෙ… පිණ්ඩපාතං දෙන්ති… සෙනාසනං දෙන්ති… ගිලානපච්චයභෙසජ්ජපරික්ඛාරං දෙන්ති… ඛාදනීයං දෙන්ති… භොජනීයං දෙන්ති…පෙ… පානීයං දෙන්තීති? ආමන්තා. හඤ්චි අත්ථි කෙචි සඞ්ඝස්ස පානීයං දෙන්ති, තෙන වත රෙ වත්තබ්බෙ – ‘‘සඞ්ඝො දක්ඛිණං පටිග්ගණ්හාතී’’ති.

න වත්තබ්බං – ‘‘සඞ්ඝො දක්ඛිණං පටිග්ගණ්හාතී’’ති? ආමන්තා. නනු වුත්තං භගවතා –

‘‘ආහුතිං ජාතවෙදොව, මහාමෙඝංව මෙදනී;

සඞ්ඝො සමාධිසම්පන්නො, පටිග්ගණ්හාති දක්ඛිණ’’න්ති.

අත්ථෙව සුත්තන්තොති? ආමන්තා. තෙන හි සඞ්ඝො දක්ඛිණං පටිග්ගණ්හාතීති.

792. සඞ්ඝො දක්ඛිණං පටිග්ගණ්හාතීති? ආමන්තා. මග්ගො පටිග්ගණ්හාති, ඵලං පටිග්ගණ්හාතීති? න හෙවං වත්තබ්බෙ…පෙ….

න වත්තබ්බං සඞ්ඝො දක්ඛිණං පටිග්ගණ්හාතීතිකථා නිට්ඨිතා.