17. සත්තරසමවග්ගො

(172) 7. න වත්තබ්බං සඞ්ඝො දක්ඛිණං විසොධෙතීතිකථා

793. න වත්තබ්බං – ‘‘සඞ්ඝො දක්ඛිණං විසොධෙතී’’ති? ආමන්තා. නනු සඞ්ඝො ආහුනෙය්‍යො පාහුනෙය්‍යො දක්ඛිණෙය්‍යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්සාති? ආමන්තා. හඤ්චි සඞ්ඝො ආහුනෙය්‍යො…පෙ… අනුත්තරං පුඤ්ඤක්ඛෙත්තං ලොකස්ස, තෙන වත රෙ වත්තබ්බෙ – ‘‘සඞ්ඝො දක්ඛිණං විසොධෙතී’’ති.

න වත්තබ්බං – ‘‘සඞ්ඝො දක්ඛිණං විසොධෙතී’’ති? ආමන්තා. නනු චත්තාරො පුරිසයුගා අට්ඨ පුරිසපුග්ගලා දක්ඛිණෙය්‍යා වුත්තා භගවතාති? ආමන්තා. හඤ්චි චත්තාරො පුරිසයුගා අට්ඨ පුරිසපුග්ගලා දක්ඛිණෙය්‍යා වුත්තා භගවතා, තෙන වත රෙ වත්තබ්බෙ – ‘‘සඞ්ඝො දක්ඛිණං විසොධෙතී’’ති.

න වත්තබ්බං – ‘‘සඞ්ඝො දක්ඛිණං විසොධෙතී’’ති? ආමන්තා. නනු අත්ථි කෙචි සඞ්ඝස්ස දානං දත්වා දක්ඛිණං ආරාධෙන්තීති? ආමන්තා. හඤ්චි අත්ථි කෙචි සඞ්ඝස්ස දානං දත්වා දක්ඛිණං ආරාධෙන්ති, තෙන වත රෙ වත්තබ්බෙ – ‘‘සඞ්ඝො දක්ඛිණං විසොධෙතී’’ති.

නනු අත්ථි කෙචි සඞ්ඝස්ස චීවරං දත්වා…පෙ… පිණ්ඩපාතං දත්වා…පෙ… සෙනාසනං දත්වා… ගිලානපච්චයභෙසජ්ජපරික්ඛාරං දත්වා… ඛාදනීයං දත්වා… භොජනීයං දත්වා…පෙ… පානීයං දත්වා දක්ඛිණං ආරාධෙන්තීති? ආමන්තා. හඤ්චි අත්ථි කෙචි සඞ්ඝස්ස පානීයං දත්වා දක්ඛිණං ආරාධෙන්ති, තෙන වත රෙ වත්තබ්බෙ – ‘‘සඞ්ඝො දක්ඛිණං විසොධෙතී’’ති.

794. සඞ්ඝො දක්ඛිණං විසොධෙතීති? ආමන්තා. මග්ගො විසොධෙති, ඵලං විසොධෙතීති? න හෙවං වත්තබ්බෙ…පෙ….

න වත්තබ්බං සඞ්ඝො දක්ඛිණං විසොධෙතීතිකථා නිට්ඨිතා.