16. සොළසමවග්ගො

(163) 8. රූපං විපාකොතිකථා

765. රූපං විපාකොති? ආමන්තා. රූපං සුඛවෙදනියං දුක්ඛවෙදනියං අදුක්ඛමසුඛවෙදනියං, සුඛාය වෙදනාය සම්පයුත්තං, දුක්ඛාය වෙදනාය සම්පයුත්තං, අදුක්ඛමසුඛාය වෙදනාය සම්පයුත්තං, ඵස්සෙන සම්පයුත්තං…පෙ… චිත්තෙන සම්පයුත්තං, සාරම්මණං, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… නනු න සුඛවෙදනියං න දුක්ඛවෙදනියං…පෙ… අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. හඤ්චි න සුඛවෙදනියං න දුක්ඛවෙදනියං…පෙ… අනාරම්මණං, නත්ථි තස්ස ආවට්ටනා…පෙ… පණිධි, නො ච වත රෙ වත්තබ්බෙ – ‘‘රූපං විපාකො’’ති.

766. ඵස්සො විපාකො, ඵස්සො සුඛවෙදනියො දුක්ඛවෙදනියො…පෙ… සාරම්මණො, අත්ථි තස්ස ආවට්ටනා…පෙ… පණිධීති? ආමන්තා. රූපං විපාකො, රූපං සුඛවෙදනියං දුක්ඛවෙදනියං…පෙ… සාරම්මණං, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

රූපං විපාකො, රූපං න සුඛවෙදනියං න දුක්ඛවෙදනියං…පෙ… අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. ඵස්සො විපාකො, ඵස්සො න සුඛවෙදනියො න දුක්ඛවෙදනියො…පෙ… අනාරම්මණො, නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

767. න වත්තබ්බං – ‘‘රූපං විපාකො’’ති? ආමන්තා. නනු කම්මස්ස කතත්තා උප්පන්නා චිත්තචෙතසිකා ධම්මා විපාකොති? ආමන්තා. හඤ්චි කම්මස්ස කතත්තා උප්පන්නා චිත්තචෙතසිකා ධම්මා විපාකො, තෙන වත රෙ වත්තබ්බෙ – ‘‘කම්මස්ස කතත්තා උප්පන්නං රූපං විපාකො’’ති.

රූපං විපාකොතිකථා නිට්ඨිතා.