16. සොළසමවග්ගො

(164) 9. රූපං රූපාවචරාරූපාවචරන්තිකථා

768. අත්ථි රූපං රූපාවචරන්ති? ආමන්තා. සමාපත්තෙසියං උපපත්තෙසියං දිට්ඨධම්මසුඛවිහාරං, සමාපත්තෙසියෙන චිත්තෙන උපපත්තෙසියෙන චිත්තෙන දිට්ඨධම්මසුඛවිහාරෙන චිත්තෙන සහගතං සහජාතං සංසට්ඨං සම්පයුත්තං එකුප්පාදං එකනිරොධං එකවත්ථුකං එකාරම්මණන්ති? න හෙවං වත්තබ්බෙ…පෙ… නනු න සමාපත්තෙසියං න උපපත්තෙසියං න දිට්ඨධම්මසුඛවිහාරං, න සමාපත්තෙසියෙන චිත්තෙන න උපපත්තෙසියෙන චිත්තෙන න දිට්ඨධම්මසුඛවිහාරෙන චිත්තෙන සහගතං සහජාතං සංසට්ඨං සම්පයුත්තං එකුප්පාදං එකනිරොධං එකවත්ථුකං එකාරම්මණන්ති? ආමන්තා. හඤ්චි න සමාපත්තෙසියං න උපපත්තෙසියං න දිට්ඨධම්මසුඛවිහාරං, න සමාපත්තෙසියෙන චිත්තෙන…පෙ… එකාරම්මණං, නො ච වත රෙ වත්තබ්බෙ – ‘‘අත්ථි රූපං රූපාවචර’’න්ති.

769. අත්ථි රූපං අරූපාවචරන්ති? ආමන්තා. සමාපත්තෙසියං උපපත්තෙසියං දිට්ඨධම්මසුඛවිහාරං, සමාපත්තෙසියෙන චිත්තෙන උපපත්තෙසියෙන චිත්තෙන දිට්ඨධම්මසුඛවිහාරෙන චිත්තෙන සහගතං සහජාතං සංසට්ඨං සම්පයුත්තං එකුප්පාදං එකනිරොධං එකවත්ථුකං එකාරම්මණන්ති? න හෙවං වත්තබ්බෙ…පෙ… නනු න සමාපත්තෙසියං න උපපත්තෙසියං න දිට්ඨධම්මසුඛවිහාරං, න සමාපත්තෙසියෙන චිත්තෙන …පෙ… එකාරම්මණන්ති? ආමන්තා. හඤ්චි න සමාපත්තෙසියං න උපපත්තෙසියං…පෙ… එකවත්ථුකං එකාරම්මණං, නො ච වත රෙ වත්තබ්බෙ – ‘‘අත්ථි රූපං අරූපාවචර’’න්ති.

770. න වත්තබ්බං – ‘‘අත්ථි රූපං රූපාවචරං, අත්ථි රූපං අරූපාවචර’’න්ති? ආමන්තා. නනු කාමාවචරකම්මස්ස කතත්තා රූපං කාමාවචරන්ති? ආමන්තා. හඤ්චි කාමාවචරකම්මස්ස කතත්තා රූපං කාමාවචරං, තෙන වත රෙ වත්තබ්බෙ – ‘‘රූපාවචරකම්මස්ස කතත්තා රූපං රූපාවචරං, අරූපාවචරකම්මස්ස කතත්තා රූපං අරූපාවචර’’න්ති.

රූපං රූපාවචරාරූපාවචරන්තිකථා නිට්ඨිතා.