(153) 9. තතියසඤ්ඤාවෙදයිතකථා
732. සඤ්ඤාවෙදයිතනිරොධං සමාපන්නො කාලං කරෙය්‍යාති? ආමන්තා. අත්ථි සඤ්ඤාවෙදයිතනිරොධං සමාපන්නස්ස මාරණන්තියො ඵස්සො, මාරණන්තියා වෙදනා, මාරණන්තියා සඤ්ඤා, මාරණන්තියා චෙතනා, මාරණන්තියං චිත්තන්ති? න හෙවං වත්තබ්බෙ…පෙ… නත්ථි සඤ්ඤාවෙදයිතනිරොධං සමාපන්නස්ස මාරණන්තියො ඵස්සො, මාරණන්තියා වෙදනා, මාරණන්තියා සඤ්ඤා, මාරණන්තියා චෙතනා, මාරණන්තියං චිත්තන්ති? ආමන්තා. හඤ්චි නත්ථි සඤ්ඤාවෙදයිතනිරොධං සමාපන්නස්ස මාරණන්තියො ඵස්සො, මාරණන්තියා වෙදනා, මාරණන්තියා සඤ්ඤා, මාරණන්තියා චෙතනා, මාරණන්තියං චිත්තං, නො ච වත රෙ වත්තබ්බෙ – ‘‘සඤ්ඤාවෙදයිතනිරොධං සමාපන්නො කාලං කරෙය්‍යා’’ති.
සඤ්ඤාවෙදයිතනිරොධං සමාපන්නො කාලං කරෙය්‍යාති? ආමන්තා. අත්ථි සඤ්ඤාවෙදයිතනිරොධං සමාපන්නස්ස ඵස්සො වෙදනා සඤ්ඤා චෙතනා චිත්තන්ති? න හෙවං වත්තබ්බෙ…පෙ… නත්ථි සඤ්ඤාවෙදයිතනිරොධං සමාපන්නස්ස ඵස්සො වෙදනා සඤ්ඤා චෙතනා චිත්තන්ති? ආමන්තා. අඵස්සකස්ස කාලං කිරියා, අවෙදනකස්ස කාලං කිරියා…පෙ… අචිත්තකස්ස කාලං කිරියාති? න හෙවං වත්තබ්බෙ…පෙ… නනු සඵස්සකස්ස කාලං කිරියා…පෙ… සචිත්තකස්ස කාලං කිරියාති? ආමන්තා. හඤ්චි සඵස්සකස්ස කාලං කිරියා…පෙ… සචිත්තකස්ස කාලං කිරියා, නො ච වත රෙ වත්තබ්බෙ – ‘‘සඤ්ඤාවෙදයිතනිරොධං සමාපන්නො කාලං කරෙය්‍යා’’ති.
සඤ්ඤාවෙදයිතනිරොධං සමාපන්නො කාලං කරෙය්‍යාති? ආමන්තා. සඤ්ඤාවෙදයිතනිරොධං සමාපන්නස්ස කායෙ විසං කමෙය්‍ය, සත්ථං කමෙය්‍ය, අග්ගි කමෙය්‍යාති? න හෙවං වත්තබ්බෙ…පෙ… සඤ්ඤාවෙදයිතනිරොධං සමාපන්නස්ස කායෙ විසං න කමෙය්‍ය, සත්ථං න කමෙය්‍ය, අග්ගි න කමෙය්‍යාති? ආමන්තා. හඤ්චි සඤ්ඤාවෙදයිතනිරොධං සමාපන්නස්ස කායෙ විසං න කමෙය්‍ය, සත්ථං න කමෙය්‍ය, අග්ගි න කමෙය්‍ය, නො ච වත රෙ වත්තබ්බෙ – ‘‘සඤ්ඤාවෙදයිතනිරොධං සමාපන්නො කාලං කරෙය්‍යා’’ති.
සඤ්ඤාවෙදයිතනිරොධං සමාපන්නො කාලං කරෙය්‍යාති? ආමන්තා. සඤ්ඤාවෙදයිතනිරොධං සමාපන්නස්ස කායෙ විසං කමෙය්‍ය, සත්ථං කමෙය්‍ය, අග්ගි කමෙය්‍යාති? ආමන්තා. න නිරොධං සමාපන්නොති? න හෙවං වත්තබ්බෙ…පෙ….
733. සඤ්ඤාවෙදයිතනිරොධං සමාපන්නො න කාලං කරෙය්‍යාති? ආමන්තා. අත්ථි සො නියාමො යෙන නියාමෙන නියතො සඤ්ඤාවෙදයිතනිරොධං සමාපන්නො න කාලං කරෙය්‍යාති? නත්ථි. හඤ්චි නත්ථි සො නියාමො යෙන නියාමෙන නියතො සඤ්ඤාවෙදයිතනිරොධං සමාපන්නො න කාලං කරෙය්‍ය, නො ච වත රෙ වත්තබ්බෙ – ‘‘සඤ්ඤාවෙදයිතනිරොධං සමාපන්නො න කාලං කරෙය්‍යාති.
734. චක්ඛුවිඤ්ඤාණසමඞ්ගී න කාලං කරෙය්‍යාති? ආමන්තා. අත්ථි සො නියාමො යෙන නියාමෙන නියතො චක්ඛුවිඤ්ඤාණසමඞ්ගී න කාලං කරෙය්‍යාති? නත්ථි. හඤ්චි නත්ථි සො නියාමො යෙන නියාමෙන නියතො චක්ඛුවිඤ්ඤාණසමඞ්ගී න කාලං කරෙය්‍ය, නො ච වත රෙ වත්තබ්බෙ – ‘‘චක්ඛුවිඤ්ඤාණසමඞ්ගී න කාලං කරෙය්‍යා’’ති.
තතියසඤ්ඤාවෙදයිතකථා නිට්ඨිතා.