15. පන්නරසමවග්ගො

(154) 10. අසඤ්ඤසත්තුපිකකථා

735. සඤ්ඤාවෙදයිතනිරොධසමාපත්ති අසඤ්ඤසත්තුපිකාති? ආමන්තා. අත්ථි සඤ්ඤාවෙදයිතනිරොධං සමාපන්නස්ස අලොභො කුසලමූලං, අදොසො කුසලමූලං, අමොහො කුසලමූලං, සද්ධා වීරියං සති සමාධි පඤ්ඤාති? න හෙවං වත්තබ්බෙ…පෙ… නත්ථි සඤ්ඤාවෙදයිතනිරොධං සමාපන්නස්ස අලොභො කුසලමූලං, අදොසො කුසලමූලං…පෙ… පඤ්ඤාති? ආමන්තා. හඤ්චි නත්ථි සඤ්ඤාවෙදයිතනිරොධං සමාපන්නස්ස අලොභො කුසලමූලං, අදොසො කුසලමූලං, අමොහො කුසලමූලං, සද්ධා වීරියං සති සමාධි පඤ්ඤා, නො ච වත රෙ වත්තබ්බෙ – ‘‘සඤ්ඤාවෙදයිතනිරොධසමාපත්ති අසඤ්ඤසත්තුපිකා’’ති.

සඤ්ඤාවෙදයිතනිරොධසමාපත්ති අසඤ්ඤසත්තුපිකාති? ආමන්තා. අත්ථි සඤ්ඤාවෙදයිතනිරොධං සමාපන්නස්ස ඵස්සො වෙදනා සඤ්ඤා චෙතනා චිත්තන්ති? න හෙවං වත්තබ්බෙ…පෙ… නත්ථි සඤ්ඤාවෙදයිතනිරොධං සමාපන්නස්ස ඵස්සො වෙදනා සඤ්ඤා චෙතනා චිත්තන්ති? ආමන්තා. අඵස්සකස්ස මග්ගභාවනා…පෙ… අචිත්තකස්ස මග්ගභාවනාති? න හෙවං වත්තබ්බෙ…පෙ… නනු සඵස්සකස්ස මග්ගභාවනා…පෙ… සචිත්තකස්ස මග්ගභාවනාති? ආමන්තා. හඤ්චි සඵස්සකස්ස මග්ගභාවනා…පෙ… සචිත්තකස්ස මග්ගභාවනා, නො ච වත රෙ වත්තබ්බෙ – ‘‘සඤ්ඤාවෙදයිතනිරොධසමාපත්ති අසඤ්ඤසත්තුපිකා’’ති.

සඤ්ඤාවෙදයිතනිරොධසමාපත්ති අසඤ්ඤසත්තුපිකාති? ආමන්තා. යෙ කෙචි සඤ්ඤාවෙදයිතනිරොධං සමාපජ්ජන්ති, සබ්බෙ තෙ අසඤ්ඤසත්තුපිකාති? න හෙවං වත්තබ්බෙ…පෙ….

736. න වත්තබ්බං – ‘‘සඤ්ඤාවෙදයිතනිරොධසමාපත්ති අසඤ්ඤසත්තුපිකා’’ති? ආමන්තා. නනු ඉධාපි අසඤ්ඤී තත්‍රාපි අසඤ්ඤීති? ආමන්තා. හඤ්චි ඉධාපි අසඤ්ඤී තත්‍රාපි අසඤ්ඤී, තෙන වත රෙ වත්තබ්බෙ – ‘‘සඤ්ඤාවෙදයිතනිරොධසමාපත්ති අසඤ්ඤසත්තුපිකා’’ති.

අසඤ්ඤසත්තුපිකකථා නිට්ඨිතා.