(128) 3. අනන්තරාපයුත්තකථා
660. අනන්තරාපයුත්තො පුග්ගලො සම්මත්තනියාමං ඔක්කමෙය්‍යාති? ආමන්තා. මිච්ඡත්තනියාමඤ්ච සම්මත්තනියාමඤ්ච උභො ඔක්කමෙය්‍යාති? න හෙවං වත්තබ්බෙ…පෙ… අනන්තරාපයුත්තො පුග්ගලො සම්මත්තනියාමං ඔක්කමෙය්‍යාති? ආමන්තා. නනු තං කම්මං පයුත්තං කුක්කුච්චං උප්පාදිතං විප්පටිසාරියං ජනිතන්ති? ආමන්තා. හඤ්චි තං කම්මං පයුත්තං කුක්කුච්චං උප්පාදිතං විප්පටිසාරියං ජනිතං, නො ච වත රෙ වත්තබ්බෙ – ‘‘අනන්තරාපයුත්තො පුග්ගලො සම්මත්තනියාමං ඔක්කමෙය්‍යා’’ති.
661. අනන්තරාපයුත්තො පුග්ගලො අභබ්බො සම්මත්තනියාමං ඔක්කමිතුන්ති? ආමන්තා. මාතා ජීවිතා වොරොපිතා… පිතා ජීවිතා වොරොපිතො… අරහා ජීවිතා වොරොපිතො… දුට්ඨෙන චිත්තෙන තථාගතස්ස ලොහිතං උප්පාදිතං… සඞ්ඝො භින්නොති? න හෙවං වත්තබ්බෙ…පෙ….
අනන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා [පටිවිනොදෙත්වා (සී. පී. ක.)] අභබ්බො සම්මත්තනියාමං ඔක්කමිතුන්ති? ආමන්තා. මාතා ජීවිතා වොරොපිතා… පිතා ජීවිතා වොරොපිතො…පෙ… සඞ්ඝො භින්නොති? න හෙවං වත්තබ්බෙ…පෙ….
අනන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා අභබ්බො සම්මත්තනියාමං ඔක්කමිතුන්ති? ආමන්තා. නනු තං කම්මං පටිසංහටං කුක්කුච්චං පටිවිනොදිතං විප්පටිසාරියං පටිවිනීතන්ති? ආමන්තා. හඤ්චි තං කම්මං පටිසංහටං කුක්කුච්චං පටිවිනොදිතං විප්පටිසාරියං පටිවිනීතං, නො ච වත රෙ වත්තබ්බෙ – ‘‘අනන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා අභබ්බො සම්මත්තනියාමං ඔක්කමිතු’’න්ති.
662. අනන්තරාපයුත්තො පුග්ගලො සම්මත්තනියාමං ඔක්කමෙය්‍යාති? ආමන්තා. නනු තං කම්මං පයුත්තො ආසීති? ආමන්තා. හඤ්චි තං කම්මං පයුත්තො ආසි, නො ච වත රෙ වත්තබ්බෙ – ‘‘අනන්තරාපයුත්තො පුග්ගලො සම්මත්තනියාමං ඔක්කමෙය්‍යා’’ති.
අනන්තරාපයුත්තකථා නිට්ඨිතා.