13. තෙරසමවග්ගො

(129) 4. නියතස්ස නියාමකථා

663. නියතො නියාමං ඔක්කමතීති? ආමන්තා. මිච්ඡත්තනියතො සම්මත්තනියාමං ඔක්කමති, සම්මත්තනියතො මිච්ඡත්තනියාමං ඔක්කමතීති? න හෙවං වත්තබ්බෙ…පෙ….

නියතො නියාමං ඔක්කමතීති? ආමන්තා. පුබ්බෙ මග්ගං භාවෙත්වා පච්ඡා නියාමං ඔක්කමතීති? න හෙවං වත්තබ්බෙ…පෙ… පුබ්බෙ සොතාපත්තිමග්ගං භාවෙත්වා පච්ඡා සොතාපත්තිනියාමං ඔක්කමතීති? න හෙවං වත්තබ්බෙ…පෙ… පුබ්බෙ සකදාගාමි…පෙ… අනාගාමි…පෙ… අරහත්තමග්ගං භාවෙත්වා පච්ඡා අරහත්තනියාමං ඔක්කමතීති? න හෙවං වත්තබ්බෙ…පෙ….

පුබ්බෙ සතිපට්ඨානං…පෙ… සම්මප්පධානං… ඉද්ධිපාදං… ඉන්ද්‍රියං… බලං… බොජ්ඣඞ්ගං භාවෙත්වා පච්ඡා නියාමං ඔක්කමතීති? න හෙවං වත්තබ්බෙ…පෙ….

664. න වත්තබ්බං – ‘‘නියතො නියාමං ඔක්කමතී’’ති? ආමන්තා. භබ්බො බොධිසත්තො තාය ජාතියා ධම්මං නාභිසමෙතුන්ති? න හෙවං වත්තබ්බෙ. තෙන හි නියතො නියාමං ඔක්කමතීති.

නියතස්ස නියාමකථා නිට්ඨිතා.