12. ද්වාදසමවග්ගො
(123) 8. ජීවිතා වොරොපනකථා
648. දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යාති? ආමන්තා. දිට්ඨිසම්පන්නො පුග්ගලො සඤ්චිච්ච මාතරං ජීවිතා වොරොපෙය්‍ය…පෙ… පිතරං ජීවිතා වොරොපෙය්‍ය …පෙ… අරහන්තං ජීවිතා වොරොපෙය්‍ය…පෙ… දුට්ඨෙන චිත්තෙන තථාගතස්ස ලොහිතං උප්පාදෙය්‍ය…පෙ… සඞ්ඝං භින්දෙය්‍යාති? න හෙවං වත්තබ්බෙ…පෙ….
දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යාති? ආමන්තා. දිට්ඨිසම්පන්නො පුග්ගලො සත්ථරි අගාරවොති? න හෙවං වත්තබ්බෙ…පෙ… ධම්මෙ…පෙ… සඞ්ඝෙ…පෙ… සික්ඛාය අගාරවොති? න හෙවං වත්තබ්බෙ…පෙ….
නනු දිට්ඨිසම්පන්නො පුග්ගලො සත්ථරි සගාරවොති? ආමන්තා. හඤ්චි දිට්ඨිසම්පන්නො පුග්ගලො සත්ථරි සගාරවො, නො ච වත රෙ වත්තබ්බෙ – ‘‘දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යා’’ති. නනු දිට්ඨිසම්පන්නො පුග්ගලො ධම්මෙ…පෙ… සඞ්ඝෙ…පෙ… සික්ඛාය සගාරවොති? ආමන්තා. හඤ්චි දිට්ඨිසම්පන්නො පුග්ගලො සික්ඛාය සගාරවො, නො ච වත රෙ වත්තබ්බෙ – ‘‘දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යා’’ති.
649. දිට්ඨිසම්පන්නො පුග්ගලො සත්ථරි අගාරවොති? ආමන්තා. දිට්ඨිසම්පන්නො පුග්ගලො බුද්ධථූපෙ ඔහදෙය්‍ය ඔමුත්තෙය්‍ය නිට්ඨුභෙය්‍ය බුද්ධථූපෙ අපබ්‍යාමතො [අසබ්‍යාකතො (සී. ක.)] කරෙය්‍යාති? න හෙවං වත්තබ්බෙ…පෙ….
දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යාති? ආමන්තා. නනු වුත්තං භගවතා – ‘‘සෙය්‍යථාපි, භික්ඛවෙ, මහාසමුද්දො ඨිතධම්මො වෙලං නාතිවත්තති; එවමෙව ඛො, භික්ඛවෙ, යං මයා සාවකානං සික්ඛාපදං පඤ්ඤත්තං තං මම සාවකා ජීවිතහෙතුපි නාතික්කමන්තී’’ති [චූළව. 385; අ. නි. 8.20; උදා. 45]! අත්ථෙව සුත්තන්තොති? ආමන්තා. තෙන හි න වත්තබ්බං – ‘‘දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්‍යා’’ති.
ජීවිතා වොරොපනකථා නිට්ඨිතා.