12. ද්වාදසමවග්ගො
(124) 9. දුග්ගතිකථා
650. දිට්ඨිසම්පන්නස්ස පුග්ගලස්ස පහීනා දුග්ගතීති? ආමන්තා. දිට්ඨිසම්පන්නො පුග්ගලො ආපායිකෙ රූපෙ රජ්ජෙය්‍යාති? ආමන්තා. හඤ්චි දිට්ඨිසම්පන්නො පුග්ගලො ආපායිකෙ රූපෙ රජ්ජෙය්‍ය, නො ච වත රෙ වත්තබ්බෙ – ‘‘දිට්ඨිසම්පන්නස්ස පුග්ගලස්ස පහීනා දුග්ගතී’’ති.
දිට්ඨිසම්පන්නස්ස පුග්ගලස්ස පහීනා දුග්ගතීති? ආමන්තා. දිට්ඨිසම්පන්නො පුග්ගලො ආපායිකෙ සද්දෙ…පෙ… ගන්ධෙ… රසෙ… ඵොට්ඨබ්බෙ…පෙ… අමනුස්සිත්ථියා තිරච්ඡානගතිත්ථියා නාගකඤ්ඤාය මෙථුනං ධම්මං පටිසෙවෙය්‍ය, අජෙළකං පටිග්ගණ්හෙය්‍ය, කුක්කුටසූකරං පටිග්ගණ්හෙය්‍ය, හත්ථිගවස්සවළවං පටිග්ගණ්හෙය්‍ය… තිත්තිරවට්ටකමොරකපිඤ්ජරං [… කපිඤ්ජලං (ස්‍යා. කං. පී.)] පටිග්ගණ්හෙය්‍යාති? ආමන්තා. හඤ්චි දිට්ඨිසම්පන්නො පුග්ගලො තිත්තිරවට්ටකමොරකපිඤ්ජරං පටිග්ගණ්හෙය්‍ය, නො ච වත රෙ වත්තබ්බෙ – ‘‘දිට්ඨිසම්පන්නස්ස පුග්ගලස්ස පහීනා දුග්ගතී’’ති.
651. දිට්ඨිසම්පන්නස්ස පුග්ගලස්ස පහීනා දුග්ගති, දිට්ඨිසම්පන්නො පුග්ගලො ආපායිකෙ රූපෙ රජ්ජෙය්‍යාති? ආමන්තා. අරහතො පහීනා දුග්ගති, අරහා ආපායිකෙ රූපෙ රජ්ජෙය්‍යාති? න හෙවං වත්තබ්බෙ…පෙ… දිට්ඨිසම්පන්නස්ස පුග්ගලස්ස පහීනා දුග්ගති, දිට්ඨිසම්පන්නො පුග්ගලො ආපායිකෙ සද්දෙ… ගන්ධෙ… රසෙ… ඵොට්ඨබ්බෙ…පෙ… තිත්තිරවට්ටකමොරකපිඤ්ජරං පටිග්ගණ්හෙය්‍යාති? ආමන්තා. අරහතො පහීනා දුග්ගති, අරහා තිත්තිරවට්ටකමොරකපිඤ්ජරං පටිග්ගණ්හෙය්‍යාති? න හෙවං වත්තබ්බෙ…පෙ….
අරහතො පහීනා දුග්ගති, න ච අරහා ආපායිකෙ රූපෙ රජ්ජෙය්‍යාති? ආමන්තා. දිට්ඨිසම්පන්නස්ස පුග්ගලස්ස පහීනා දුග්ගති, න ච දිට්ඨිසම්පන්නො පුග්ගලො ආපායිකෙ රූපෙ රජ්ජෙය්‍යාති? න හෙවං වත්තබ්බෙ…පෙ… අරහතො පහීනා දුග්ගති, න ච අරහා ආපායිකෙ සද්දෙ…පෙ… ගන්ධෙ…පෙ… රසෙ…පෙ… ඵොට්ඨබ්බෙ…පෙ… අමනුස්සිත්ථියා තිරච්ඡානගතිත්ථියා නාගකඤ්ඤාය මෙථුනං ධම්මං පටිසෙවෙය්‍ය, අජෙළකං පටිග්ගණ්හෙය්‍ය, කුක්කුටසූකරං පටිග්ගණ්හෙය්‍ය, හත්ථිගවස්සවළවං පටිග්ගණ්හෙය්‍ය…පෙ… තිත්තිරවට්ටකමොරකපිඤ්ජරං පටිග්ගණ්හෙය්‍යාති? ආමන්තා. දිට්ඨිසම්පන්නස්ස පුග්ගලස්ස පහීනා දුග්ගති, න ච දිට්ඨිසම්පන්නො පුග්ගලො තිත්තිරවට්ටකමොරකපිඤ්ජරං පටිග්ගණ්හෙය්‍යාති? න හෙවං වත්තබ්බෙ…පෙ….
652. [අට්ඨකථානුලොමං පරවාදීපුච්ඡාලක්ඛණං. තථාපායං පුච්ඡා සකවාදිස්ස, පුරිමායො ච ඉමිස්සං දුග්ගතිකථායං පරවාදිස්සාති ගහෙතබ්බා විය දිස්සන්ති] න වත්තබ්බං – ‘‘දිට්ඨිසම්පන්නස්ස පුග්ගලස්ස පහීනා දුග්ගතී’’ති? ආමන්තා. දිට්ඨිසම්පන්නො පුග්ගලො නිරයං උපපජ්ජෙය්‍ය…පෙ… තිරච්ඡානයොනිං උපපජ්ජෙය්‍ය… පෙත්තිවිසයං උපපජ්ජෙය්‍යාති? න හෙවං වත්තබ්බෙ. තෙන හි දිට්ඨිසම්පන්නස්ස පුග්ගලස්ස පහීනා දුග්ගතීති.
දුග්ගතිකථා නිට්ඨිතා.