11. එකාදසමවග්ගො
(112) 7. ඉද්ධිබලකථා
621. ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. ඉද්ධිමයිකො සො ආයු, ඉද්ධිමයිකා සා ගති, ඉද්ධිමයිකො සො අත්තභාවප්පටිලාභොති? න හෙවං වත්තබ්බෙ…පෙ….
ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. අතීතං කප්පං තිට්ඨෙය්‍ය, අනාගතං කප්පං තිට්ඨෙය්‍යාති? න හෙවං වත්තබ්බෙ…පෙ… ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. ද්වෙ කප්පෙ තිට්ඨෙය්‍ය, තයො කප්පෙ තිට්ඨෙය්‍ය, චත්තාරො කප්පෙ තිට්ඨෙය්‍යාති? න හෙවං වත්තබ්බෙ…පෙ… ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. සති ජීවිතෙ ජීවිතාවසෙසෙ තිට්ඨෙය්‍ය, අසති ජීවිතෙ ජීවිතාවසෙසෙ තිට්ඨෙය්‍යාති? සති ජීවිතෙ ජීවිතාවසෙසෙ තිට්ඨෙය්‍යාති. හඤ්චි සති ජීවිතෙ ජීවිතාවසෙසෙ තිට්ඨෙය්‍ය, නො ච වත රෙ වත්තබ්බෙ – ‘‘ඉද්ධිබලෙන සමන්නාගතො කප්පං තිට්ඨෙය්‍යා’’ති. අසති ජීවිතෙ ජීවිතාවසෙසෙ තිට්ඨෙය්‍යාති, මතො තිට්ඨෙය්‍ය, කාලඞ්කතො තිට්ඨෙය්‍යාති? න හෙවං වත්තබ්බෙ…පෙ….
622. ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. උප්පන්නො ඵස්සො මා නිරුජ්ඣීති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ… උප්පන්නා වෙදනා…පෙ… උප්පන්නා සඤ්ඤා …පෙ… උප්පන්නා චෙතනා…පෙ… උප්පන්නං චිත්තං… උප්පන්නා සද්ධා… උප්පන්නං වීරියං… උප්පන්නා සති… උප්පන්නො සමාධි …පෙ… උප්පන්නා පඤ්ඤා මා නිරුජ්ඣීති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ….
ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. රූපං නිච්චං හොතූති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ… වෙදනා…පෙ… සඤ්ඤා… සඞ්ඛාරා… විඤ්ඤාණං නිච්චං හොතූති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ….
ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. ජාතිධම්මා සත්තා මා ජායිංසූති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ… ජරාධම්මා සත්තා මා ජීරිංසූති…පෙ… බ්‍යාධිධම්මා සත්තා මා බ්‍යාධියිංසූති…පෙ… මරණධම්මා සත්තා මා මීයිංසූති ලබ්භා ඉද්ධියා පග්ගහෙතුන්ති? න හෙවං වත්තබ්බෙ…පෙ….
623. න වත්තබ්බං – ‘‘ඉද්ධිබලෙන සමන්නාගතො කප්පං තිට්ඨෙය්‍යා’’ති? ආමන්තා. නනු වුත්තං භගවතා – ‘‘යස්ස කස්සචි, ආනන්ද, චත්තාරො ඉද්ධිපාදා භාවිතා බහුලීකතා යානීකතා වත්ථුකතා අනුට්ඨිතා පරිචිතා සුසමාරද්ධා, සො ආකඞ්ඛමානො කප්පං වා තිට්ඨෙය්‍ය කප්පාවසෙසං වා’’ති [දී. නි. 2.166; සං. නි. 5.822; උදා. 51]! අත්ථෙව සුත්තන්තොති? ආමන්තා. තෙන හි ඉද්ධිබලෙන සමන්නාගතො කප්පං තිට්ඨෙය්‍යාති.
624. ඉද්ධිබලෙන සමන්නාගතො කප්පං තිට්ඨෙය්‍යාති? ආමන්තා. නනු වුත්තං භගවතා – ‘‘චතුන්නං, භික්ඛවෙ, ධම්මානං නත්ථි කොචි පාටිභොගො සමණො වා බ්‍රාහ්මණො වා දෙවො වා මාරො වා බ්‍රහ්මා වා කොචි වා ලොකස්මිං! කතමෙසං චතුන්නං? ජරාධම්මො ‘‘මා ජීරී’’ති නත්ථි කොචි පාටිභොගො සමණො වා බ්‍රාහ්මණො වා දෙවො වා මාරො වා බ්‍රහ්මා වා කොචි වා ලොකස්මිං. බ්‍යාධිධම්මො ‘‘මා බ්‍යාධියී’’ති…පෙ… මරණධම්මො ‘‘මා මීයී’’ති…පෙ… යානි ඛො පන තානි පුබ්බෙ කතානි පාපකානි කම්මානි සංකිලෙසිකානි පොනොබ්භවිකානි [පොනොභවිකානි (සී. පී.)] සදරානි [නිස්සාරානි (සී. පී. ක.), දුක්ඛුද්‍රයානි (ස්‍යා.)] දුක්ඛවිපාකානි ආයතිං ජාතිජරාමරණියානි තෙසං විපාකො ‘‘මා නිබ්බත්තී’’ති නත්ථි කොචි පාටිභොගො සමණො වා බ්‍රාහ්මණො වා දෙවො වා මාරො වා බ්‍රහ්මා වා කොචි වා ලොකස්මිං. ඉමෙසං ඛො, භික්ඛවෙ, චතුන්නං ධම්මානං නත්ථි කොචි පාටිභොගො සමණො වා බ්‍රාහ්මණො වා දෙවො වා මාරො වා බ්‍රහ්මා වා කොචි වා ලොකස්මි’’න්ති [අ. නි. 4.182]. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘ඉද්ධිබලෙන සමන්නාගතො කප්පං තිට්ඨෙය්‍යා’’ති.
ඉද්ධිබලකථා නිට්ඨිතා.