11. එකාදසමවග්ගො

(113) 8. සමාධිකථා

625. චිත්තසන්තති සමාධීති? ආමන්තා. අතීතා චිත්තසන්තති සමාධීති? න හෙවං වත්තබ්බෙ …පෙ… චිත්තසන්තති සමාධීති? ආමන්තා. අනාගතා චිත්තසන්තති සමාධීති? න හෙවං වත්තබ්බෙ…පෙ… චිත්තසන්තති සමාධීති? ආමන්තා. නනු අතීතං නිරුද්ධං අනාගතං අජාතන්ති? ආමන්තා. හඤ්චි අතීතං නිරුද්ධං අනාගතං අජාතං, නො ච වත රෙ වත්තබ්බෙ – ‘‘චිත්තසන්තති සමාධී’’ති.

626. එකචිත්තක්ඛණිකො සමාධීති? ආමන්තා. චක්ඛුවිඤ්ඤාණසමඞ්ගී සමාපන්නොති? න හෙවං වත්තබ්බෙ…පෙ… සොතවිඤ්ඤාණසමඞ්ගී…පෙ… ඝානවිඤ්ඤාණසමඞ්ගී… ජිව්හාවිඤ්ඤාණසමඞ්ගී… කායවිඤ්ඤාණසමඞ්ගී…පෙ… අකුසලචිත්තසමඞ්ගී …පෙ… රාගසහගතචිත්තසමඞ්ගී…පෙ… දොසසහගතචිත්තසමඞ්ගී…පෙ… මොහසහගතචිත්තසමඞ්ගී…පෙ… අනොත්තප්පසහගතචිත්තසමඞ්ගී සමාපන්නොති? න හෙවං වත්තබ්බෙ…පෙ….

චිත්තසන්තති සමාධීති? ආමන්තා. අකුසලචිත්තසන්තති සමාධීති? න හෙවං වත්තබ්බෙ…පෙ… රාගසහගතා…පෙ… දොසසහගතා…පෙ… මොහසහගතා…පෙ… අනොත්තප්පසහගතා චිත්තසන්තති සමාධීති? න හෙවං වත්තබ්බෙ…පෙ….

න වත්තබ්බං – ‘‘චිත්තසන්තති සමාධී’’ති? ආමන්තා. නනු වුත්තං භගවතා – ‘‘අහං ඛො, ආවුසො නිගණ්ඨා, පහොමි අනිඤ්ජමානො කායෙන, අභාසමානො වාචං, සත්ත රත්තින්දිවානි [රත්තිදිවානි (ක.)] එකන්තසුඛං පටිසංවෙදී විහරිතු’’න්ති [ම. නි. 1.180]! අත්ථෙව සුත්තන්තොති? ආමන්තා. තෙන හි චිත්තසන්තති සමාධීති.

සමාධිකථා නිට්ඨිතා.