11. එකාදසමවග්ගො

(111) 6. ඉදං දුක්ඛන්තිකථා

618. ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘අයං දුක්ඛසමුදයො’’ති වාචං භාසතො ‘‘අයං දුක්ඛසමුදයො’’ති ඤාණං පවත්තතීති? න හෙවං වත්තබ්බෙ…පෙ… ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘අයං දුක්ඛනිරොධො’’ති වාචං භාසතො ‘‘අයං දුක්ඛනිරොධො’’ති ඤාණං පවත්තතීති? න හෙවං වත්තබ්බෙ…පෙ… ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘අයං මග්ගො’’ති වාචං භාසතො ‘‘අයං මග්ගො’’ති ඤාණං පවත්තතීති? න හෙවං වත්තබ්බෙ…පෙ….

‘‘අයං සමුදයො’’ති වාචං භාසතො න ච ‘‘අයං සමුදයො’’ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘ඉදං දුක්ඛ’’න්ති ඤාණං පවත්තතීති? න හෙවං වත්තබ්බෙ…පෙ… ‘‘අයං නිරොධො’’ති… ‘‘අයං මග්ගො’’ති වාචං භාසතො න ච ‘‘අයං මග්ගො’’ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘ඉදං දුක්ඛ’’න්ති ඤාණං පවත්තතීති? න හෙවං වත්තබ්බෙ…පෙ….

619. ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘රූපං අනිච්ච’’න්ති වාචං භාසතො ‘‘රූපං අනිච්ච’’න්ති ඤාණං පවත්තතීති? න හෙවං වත්තබ්බෙ…පෙ… ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. වෙදනා… සඤ්ඤා… සඞ්ඛාරා… ‘‘විඤ්ඤාණං අනිච්ච’’න්ති වාචං භාසතො ‘‘විඤ්ඤාණං අනිච්ච’’න්ති ඤාණං පවත්තතීති? න හෙවං වත්තබ්බෙ…පෙ….

‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘රූපං අනත්තා’’ති වාචං භාසතො ‘‘රූපං අනත්තා’’ති ඤාණං පවත්තතීති? න හෙවං වත්තබ්බෙ…පෙ… ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. වෙදනා … සඤ්ඤා… සඞ්ඛාරා… ‘‘විඤ්ඤාණං අනත්තා’’ති වාචං භාසතො ‘‘විඤ්ඤාණං අනත්තා’’ති ඤාණං පවත්තතීති? න හෙවං වත්තබ්බෙ…පෙ….

‘‘රූපං අනිච්ච’’න්ති වාචං භාසතො න ච ‘‘රූපං අනිච්ච’’න්ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘ඉදං දුක්ඛ’’න්ති ඤාණං පවත්තතීති? න හෙවං වත්තබ්බෙ…පෙ… වෙදනා… සඤ්ඤා… සඞ්ඛාරා… ‘‘විඤ්ඤාණං අනිච්ච’’න්ති වාචං භාසතො න ච ‘‘විඤ්ඤාණං අනිච්ච’’න්ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘ඉදං දුක්ඛ’’න්ති ඤාණං පවත්තතීති? න හෙවං වත්තබ්බෙ…පෙ….

‘‘රූපං අනත්තා’’ති වාචං භාසතො න ච ‘‘රූපං අනත්තා’’ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘ඉදං දුක්ඛ’’න්ති ඤාණං පවත්තතීති? න හෙවං වත්තබ්බෙ …පෙ… වෙදනා… සඤ්ඤා… සඞ්ඛාරා… ‘‘විඤ්ඤාණං අනත්තා’’ති වාචං භාසතො න ච ‘‘විඤ්ඤාණං අනත්තා’’ති ඤාණං පවත්තතීති? ආමන්තා. ‘‘ඉදං දුක්ඛ’’න්ති වාචං භාසතො න ච ‘‘දුක්ඛ’’න්ති ඤාණං පවත්තතීති? න හෙවං වත්තබ්බෙ…පෙ….

620. ‘‘ඉදං දුක්ඛ’’න්ති වාචං භාසතො ‘‘ඉදං දුක්ඛ’’න්ති ඤාණං පවත්තතීති? ආමන්තා. ‘‘ඉ’’ති [ඊති (ස්‍යා. පී.)] ච ‘‘ද’’න්ති ච ‘‘දු’’ති [දූති (ස්‍යා. පී.)] ච ‘‘ඛ’’න්ති ච ඤාණං පවත්තතීති? න හෙවං වත්තබ්බෙ…පෙ….

ඉදං දුක්ඛන්තිකථා නිට්ඨිතා.