11. එකාදසමවග්ගො

(110) 5. ඤාණං චිත්තවිප්පයුත්තන්තිකථා

616. ඤාණං චිත්තවිප්පයුත්තන්ති? ආමන්තා. රූපං නිබ්බානං චක්ඛායතනං…පෙ… ඵොට්ඨබ්බායතනන්ති? න හෙවං වත්තබ්බෙ…පෙ… ඤාණං චිත්තවිප්පයුත්තන්ති? ආමන්තා. පඤ්ඤා පඤ්ඤින්ද්‍රියං පඤ්ඤාබලං සම්මාදිට්ඨි ධම්මවිචයසම්බොජ්ඣඞ්ගො චිත්තවිප්පයුත්තොති? න හෙවං වත්තබ්බෙ…පෙ… පඤ්ඤා පඤ්ඤින්ද්‍රියං පඤ්ඤාබලං සම්මාදිට්ඨි ධම්මවිචයසම්බොජ්ඣඞ්ගො චිත්තසම්පයුත්තොති? ආමන්තා. ඤාණං චිත්තසම්පයුත්තන්ති? න හෙවං වත්තබ්බෙ…පෙ….

ඤාණං චිත්තවිප්පයුත්තන්ති? ආමන්තා. කතමක්ඛන්ධපරියාපන්නන්ති? සඞ්ඛාරක්ඛන්ධපරියාපන්නන්ති. සඞ්ඛාරක්ඛන්ධො චිත්තවිප්පයුත්තොති? න හෙවං වත්තබ්බෙ…පෙ… සඞ්ඛාරක්ඛන්ධො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො චිත්තවිප්පයුත්තොති? න හෙවං වත්තබ්බෙ…පෙ… ඤාණං සඞ්ඛාරක්ඛන්ධපරියාපන්නං චිත්තවිප්පයුත්තන්ති? ආමන්තා. පඤ්ඤා සඞ්ඛාරක්ඛන්ධපරියාපන්නා චිත්තවිප්පයුත්තාති? න හෙවං වත්තබ්බෙ…පෙ… පඤ්ඤා සඞ්ඛාරක්ඛන්ධපරියාපන්නා චිත්තසම්පයුත්තාති? ආමන්තා. ඤාණං සඞ්ඛාරක්ඛන්ධපරියාපන්නං චිත්තසම්පයුත්තන්ති? න හෙවං වත්තබ්බෙ…පෙ… ඤාණං සඞ්ඛාරක්ඛන්ධපරියාපන්නං චිත්තවිප්පයුත්තං, පඤ්ඤා සඞ්ඛාරක්ඛන්ධපරියාපන්නා චිත්තසම්පයුත්තාති? ආමන්තා. සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ…පෙ… සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ…පෙ….

617. න වත්තබ්බං – ‘‘ඤාණං චිත්තවිප්පයුත්ත’’න්ති? ආමන්තා. අරහා චක්ඛුවිඤ්ඤාණසමඞ්ගී ‘‘ඤාණී’’ති වත්තබ්බොති? ආමන්තා. ඤාණං තෙන චිත්තෙන සම්පයුත්තන්ති? න හෙවං වත්තබ්බෙ. තෙන හි ඤාණං චිත්තවිප්පයුත්තන්ති.

අරහා චක්ඛුවිඤ්ඤාණසමඞ්ගී ‘‘පඤ්ඤවා’’ති වත්තබ්බොති [සකවාදීපුච්ඡා විය දිස්සති]? ආමන්තා. පඤ්ඤා තෙන චිත්තෙන සම්පයුත්තාති? න හෙවං වත්තබ්බෙ. තෙන හි පඤ්ඤා චිත්තවිප්පයුත්තාති.

ඤාණං චිත්තවිප්පයුත්තන්තිකථා නිට්ඨිතා.