(104) 10. විඤ්ඤත්ති සීලන්තිකථා

601. විඤ්ඤත්ති සීලන්ති? ආමන්තා. පාණාතිපාතා වෙරමණීති? න හෙවං වත්තබ්බෙ…පෙ… අදින්නාදානා වෙරමණීති? න හෙවං වත්තබ්බෙ…පෙ… කාමෙසුමිච්ඡාචාරා වෙරමණීති? න හෙවං වත්තබ්බෙ …පෙ… මුසාවාදා වෙරමණීති? න හෙවං වත්තබ්බෙ…පෙ… සුරාමෙරයමජ්ජපමාදට්ඨානා වෙරමණීති? න හෙවං වත්තබ්බෙ…පෙ….

අභිවාදනං සීලං, පච්චුට්ඨානං සීලං, අඤ්ජලිකම්මං සීලං, සාමීචිකම්මං සීලං, ආසනාභිහාරො සීලං, සෙය්‍යාභිහාරො සීලං, පාදොදකාභිහාරො සීලං, පාදකථලිකාභිහාරො සීලං, න්හානෙ පිට්ඨිපරිකම්මං සීලන්ති? ආමන්තා. පාණාතිපාතා වෙරමණීති? න හෙවං වත්තබ්බෙ…පෙ… සුරාමෙරයමජ්ජපමාදට්ඨානා වෙරමණීති? න හෙවං වත්තබ්බෙ…පෙ….

602. න වත්තබ්බං – ‘‘විඤ්ඤත්ති සීල’’න්ති? ආමන්තා. දුස්සිල්‍යන්ති? න හෙවං වත්තබ්බෙ…පෙ… තෙන හි විඤ්ඤත්ති සීලන්ති.

විඤ්ඤත්ති සීලන්තිකථා නිට්ඨිතා.