10. දසමවග්ගො

(105) 11. අවිඤ්ඤත්ති දුස්සිල්‍යන්තිකථා

603. අවිඤ්ඤත්ති දුස්සිල්‍යන්ති? ආමන්තා. පාණාතිපාතොති? න හෙවං වත්තබ්බෙ…පෙ… අදින්නාදානන්ති? න හෙවං වත්තබ්බෙ…පෙ… කාමෙසුමිච්ඡාචාරොති? න හෙවං වත්තබ්බෙ…පෙ… මුසාවාදොති? න හෙවං වත්තබ්බෙ…පෙ… සුරාමෙරයමජ්ජපමාදට්ඨානන්ති? න හෙවං වත්තබ්බෙ…පෙ….

පාපකම්මං සමාදියිත්වා දානං දදන්තස්ස පුඤ්ඤඤ්ච අපුඤ්ඤඤ්ච උභො වඩ්ඪන්තීති? න හෙවං වත්තබ්බෙ…පෙ… පුඤ්ඤඤ්ච අපුඤ්ඤඤ්ච උභො වඩ්ඪන්තීති? ආමන්තා. ද්වින්නං ඵස්සානං…පෙ… ද්වින්නං චිත්තානං සමොධානං හොතීති? න හෙවං වත්තබ්බෙ…පෙ… ද්වින්නං ඵස්සානං…පෙ… ද්වින්නං චිත්තානං සමොධානං හොතීති? ආමන්තා. කුසලාකුසලා සාවජ්ජානවජ්ජා හීනපණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තීති? න හෙවං වත්තබ්බෙ…පෙ….

කුසලාකුසලා සාවජ්ජානවජ්ජා හීනපණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තීති? ආමන්තා. නනු වුත්තං භගවතා – ‘‘චත්තාරිමානි, භික්ඛවෙ, සුවිදූරවිදූරානි! කතමානි චත්තාරි? නභඤ්ච, භික්ඛවෙ, පථවී ච – ඉදං පඨමං සුවිදූරවිදූරං…පෙ… තස්මා සතං ධම්මො අසබ්භි ආරකා’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘කුසලාකුසලා සාවජ්ජානවජ්ජා හීනපණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’’ති.

604. න වත්තබ්බං – ‘‘අවිඤ්ඤත්ති දුස්සිල්‍ය’’න්ති? ආමන්තා. නනු පාපකම්මං සමාදින්නො ආසීති? ආමන්තා. හඤ්චි පාපකම්මං සමාදින්නො ආසි, තෙන වත රෙ වත්තබ්බෙ – ‘‘අවිඤ්ඤත්ති දුස්සිල්‍ය’’න්ති.

අවිඤ්ඤත්ති දුස්සිල්‍යන්තිකථා නිට්ඨිතා.

දසමවග්ගො.

තස්සුද්දානං –

උපපත්තෙසියෙ පඤ්චක්ඛන්ධෙ අනිරුද්ධෙ කිරියා පඤ්චක්ඛන්ධා උප්පජ්ජන්ති, මග්ගසමඞ්ගිස්ස රූපං මග්ගො, පඤ්චවිඤ්ඤාණසමඞ්ගිස්ස අත්ථි මග්ගභාවනා, පඤ්චවිඤ්ඤාණා කුසලාපි අකුසලාපි, පඤ්චවිඤ්ඤාණා සාභොගා, මග්ගසමඞ්ගී ද්වීහි සීලෙහි සමන්නාගතො, සීලං අචෙතසිකං, සීලං න චිත්තානුපරිවත්ති, සමාදානහෙතුකං සීලං වඩ්ඪතීති, විඤ්ඤත්තිසීලං අවිඤ්ඤත්ති දුස්සිල්‍යන්ති.

දුතියො පණ්ණාසකො.

තස්සුද්දානං –

නියාමසඞ්ගහගතානිසංසතා ච නිරොධොති [නියාම සඞ්ගහගතානිසංසතා අත්ථි පඤ්චවොකාරභවො නිරොධො මග්ගසමඞ්ගිස්ස පඤ්චවොකාරභවොති (සී. ස්‍යා. ක.), නියාම සඞ්ගහ ගතානිසංසතා අත්ථි පඤ්චවොකාරභවො මග්ගසමඞ්ගිස්ස නො පඤ්චවොකාරභවො (පී.)].