9. නවමවග්ගො

(89) 6. අතීතානාගතාරම්මණකථා

559. අතීතාරම්මණං චිත්තං අනාරම්මණන්ති? ආමන්තා. නනු අතීතාරම්මණන්ති? ආමන්තා. හඤ්චි අතීතාරම්මණං, නො ච වත රෙ වත්තබ්බෙ – ‘‘අතීතාරම්මණං චිත්තං අනාරම්මණ’’න්ති. අතීතාරම්මණං චිත්තං අනාරම්මණන්ති මිච්ඡා. හඤ්චි වා පන අනාරම්මණං, නො ච වත රෙ වත්තබ්බෙ – ‘‘අතීතාරම්මණ’’න්ති. අනාරම්මණං අතීතාරම්මණන්ති මිච්ඡා.

අතීතාරම්මණං චිත්තං අනාරම්මණන්ති? ආමන්තා. නනු අතීතං ආරබ්භ අත්ථි ආවට්ටනා…පෙ… පණිධීති? ආමන්තා. හඤ්චි අතීතං ආරබ්භ අත්ථි ආවට්ටනා…පෙ… පණිධි, නො ච වත රෙ වත්තබ්බෙ – ‘‘අතීතාරම්මණං චිත්තං අනාරම්මණ’’න්ති.

560. අනාගතාරම්මණං චිත්තං අනාරම්මණන්ති? ආමන්තා. නනු අනාගතාරම්මණන්ති? ආමන්තා. හඤ්චි අනාගතාරම්මණං, නො ච වත රෙ වත්තබ්බෙ – ‘‘අනාගතාරම්මණං චිත්තං අනාරම්මණ’’න්ති. අනාගතාරම්මණං චිත්තං අනාරම්මණන්ති මිච්ඡා. හඤ්චි වා පන අනාරම්මණං, නො ච වත රෙ වත්තබ්බෙ – ‘‘අනාගතාරම්මණ’’න්ති. අනාරම්මණං අනාගතාරම්මණන්ති මිච්ඡා.

අනාගතාරම්මණං චිත්තං අනාරම්මණන්ති? ආමන්තා. නනු අනාගතං ආරබ්භ අත්ථි ආවට්ටනා…පෙ… පණිධීති? ආමන්තා. හඤ්චි අනාගතං ආරබ්භ අත්ථි ආවට්ටනා…පෙ… පණිධි, නො ච වත රෙ වත්තබ්බෙ – ‘‘අනාගතාරම්මණං චිත්තං අනාරම්මණ’’න්ති.

පච්චුප්පන්නං ආරබ්භ අත්ථි ආවට්ටනා…පෙ… පණිධි, පච්චුප්පන්නාරම්මණං චිත්තං සාරම්මණන්ති? ආමන්තා. අතීතං ආරබ්භ අත්ථි ආවට්ටනා…පෙ… පණිධි, අතීතාරම්මණං චිත්තං සාරම්මණන්ති? න හෙවං වත්තබ්බෙ…පෙ… පච්චුප්පන්නං ආරබ්භ අත්ථි ආවට්ටනා…පෙ… පණිධි, පච්චුප්පන්නාරම්මණං චිත්තං සාරම්මණන්ති? ආමන්තා. අනාගතං ආරබ්භ අත්ථි ආවට්ටනා…පෙ… පණිධි, අනාගතාරම්මණං චිත්තං සාරම්මණන්ති? න හෙවං වත්තබ්බෙ…පෙ….

අතීතං ආරබ්භ අත්ථි ආවට්ටනා…පෙ… පණිධි, අතීතාරම්මණං චිත්තං අනාරම්මණන්ති? ආමන්තා. පච්චුප්පන්නං ආරබ්භ අත්ථි ආවට්ටනා…පෙ… පණිධි, පච්චුප්පන්නාරම්මණං චිත්තං අනාරම්මණන්ති? න හෙවං වත්තබ්බෙ…පෙ….

අනාගතං ආරබ්භ අත්ථි ආවට්ටනා…පෙ… පණිධි, අනාගතාරම්මණං චිත්තං අනාරම්මණන්ති? ආමන්තා. පච්චුප්පන්නං ආරබ්භ අත්ථි ආවට්ටනා…පෙ… පණිධි, පච්චුප්පන්නාරම්මණං චිත්තං අනාරම්මණන්ති? න හෙවං වත්තබ්බෙ…පෙ….

561. න වත්තබ්බං – ‘‘අතීතානාගතාරම්මණං චිත්තං අනාරම්මණ’’න්ති? ආමන්තා. නනු අතීතානාගතං නත්ථීති? ආමන්තා. හඤ්චි අතීතානාගතං නත්ථි, තෙන වත රෙ වත්තබ්බෙ – ‘‘අතීතානාගතාරම්මණං චිත්තං අනාරම්මණ’’න්ති…පෙ….

අතීතානාගතාරම්මණකථා නිට්ඨිතා.