9. නවමවග්ගො

(90) 7. විතක්කානුපතිතකථා

562. සබ්බං චිත්තං විතක්කානුපතිතන්ති? ආමන්තා. සබ්බං චිත්තං විචාරානුපතිතං පීතානුපතිතං සුඛානුපතිතං දුක්ඛානුපතිතං සොමනස්සානුපතිතං දොමනස්සානුපතිතං උපෙක්ඛානුපතිතං සද්ධානුපතිතං වීරියානුපතිතං සතානුපතිතං සමාධානුපතිතං පඤ්ඤානුපතිතං රාගානුපතිතං දොසානුපතිතං…පෙ… අනොත්තප්පානුපතිතන්ති? න හෙවං වත්තබ්බෙ…පෙ….

සබ්බං චිත්තං විතක්කානුපතිතන්ති? ආමන්තා. නනු අත්ථි අවිතක්කො විචාරමත්තො සමාධීති? ආමන්තා. හඤ්චි අත්ථි අවිතක්කො විචාරමත්තො සමාධි, නො ච වත රෙ වත්තබ්බෙ – ‘‘සබ්බං චිත්තං විතක්කානුපතිත’’න්ති.

සබ්බං චිත්තං විතක්කානුපතිතන්ති? ආමන්තා. නනු අත්ථි අවිතක්කො අවිචාරො සමාධීති? ආමන්තා. හඤ්චි අත්ථි අවිතක්කො අවිචාරො සමාධි, නො ච වත රෙ වත්තබ්බෙ – ‘‘සබ්බං චිත්තං විතක්කානුපතිත’’න්ති. සබ්බං චිත්තං විතක්කානුපතිතන්ති? ආමන්තා. නනු තයො සමාධී වුත්තා භගවතා – සවිතක්කො සවිචාරො සමාධි, අවිතක්කො විචාරමත්තො සමාධි, අවිතක්කො අවිචාරො සමාධීති [දී. නි. 3.305, 353]? ආමන්තා. හඤ්චි තයො සමාධී වුත්තා භගවතා – සවිතක්කො සවිචාරො සමාධි, අවිතක්කො විචාරමත්තො සමාධි, අවිතක්කො අවිචාරො සමාධි, නො ච වත රෙ වත්තබ්බෙ – ‘‘සබ්බං චිත්තං විතක්කානුපතිත’’න්ති.

විතක්කානුපතිතකථා නිට්ඨිතා.