(84) 1. ආනිසංසදස්සාවීකථා

547. ආනිසංසදස්සාවිස්ස සංයොජනානං පහානන්ති? ආමන්තා. නනු සඞ්ඛාරෙ අනිච්චතො මනසිකරොතො සංයොජනා පහීයන්තීති? ආමන්තා. හඤ්චි සඞ්ඛාරෙ අනිච්චතො මනසිකරොතො සංයොජනා පහීයන්ති, නො ච වත රෙ වත්තබ්බෙ – ‘‘ආනිසංසදස්සාවිස්ස සංයොජනානං පහාන’’න්ති.

නනු සඞ්ඛාරෙ දුක්ඛතො…පෙ… රොගතො… ගණ්ඩතො… සල්ලතො… අඝතො… ආබාධතො… පරතො… පලොකතො… ඊතිතො… උපද්දවතො… භයතො… උපසග්ගතො… චලතො… පභඞ්ගුතො… අද්ධුවතො… අතාණතො… අලෙණතො… අසරණතො… අසරණීභූතතො… රිත්තතො… තුච්ඡතො… සුඤ්ඤතො… අනත්තතො… ආදීනවතො…පෙ… විපරිණාමධම්මතො මනසිකරොතො සංයොජනා පහීයන්තීති? ආමන්තා. හඤ්චි සඞ්ඛාරෙ විපරිණාමධම්මතො මනසිකරොතො සංයොජනා පහීයන්ති, නො ච වත රෙ වත්තබ්බෙ – ‘‘ආනිසංසදස්සාවිස්ස සංයොජනානං පහාන’’න්ති.

සඞ්ඛාරෙ ච අනිච්චතො මනසි කරොති නිබ්බානෙ ච ආනිසංසදස්සාවී හොතීති? න හෙවං වත්තබ්බෙ…පෙ… සඞ්ඛාරෙ ච අනිච්චතො මනසි කරොති නිබ්බානෙ ච ආනිසංසදස්සාවී හොතීති? ආමන්තා. ද්වින්නං ඵස්සානං…පෙ… ද්වින්නං චිත්තානං සමොධානං හොතීති? න හෙවං වත්තබ්බෙ…පෙ… සඞ්ඛාරෙ ච දුක්ඛතො…පෙ… විපරිණාමධම්මතො මනසි කරොති නිබ්බානෙ ච ආනිසංසදස්සාවී හොතීති? න හෙවං වත්තබ්බෙ…පෙ… සඞ්ඛාරෙ ච විපරිණාමධම්මතො මනසි කරොති නිබ්බානෙ ච ආනිසංසදස්සාවී හොතීති? ආමන්තා. ද්වින්නං ඵස්සානං…පෙ… ද්වින්නං චිත්තානං සමොධානං හොතීති? න හෙවං වත්තබ්බෙ…පෙ….

548. න වත්තබ්බං – ‘‘ආනිසංසදස්සාවිස්ස සංයොජනානං පහාන’’න්ති? ආමන්තා. නනු වුත්තං භගවතා – ‘‘ඉධ, භික්ඛවෙ, භික්ඛු නිබ්බානෙ සුඛානුපස්සී විහරති සුඛසඤ්ඤී සුඛපටිසංවෙදී, සතතං සමිතං අබ්බොකිණ්ණං චෙතසා අධිමුච්චමානො පඤ්ඤාය පරියොගාහමානො’’ති [අ. නි. 7.19]! අත්ථෙව සුත්තන්තොති? ආමන්තා. තෙන හි ආනිසංසදස්සාවිස්ස සංයොජනානං පහානන්ති.

ආනිසංසදස්සාවීකථා නිට්ඨිතා.