9. නවමවග්ගො

(85) 2. අමතාරම්මණකථා

549. අමතාරම්මණං සංයොජනන්ති? ආමන්තා. අමතං සංයොජනියං ගන්ථනියං ඔඝනියං යොගනියං නීවරණියං පරාමට්ඨං උපාදානියං සංකිලෙසියන්ති? න හෙවං වත්තබ්බෙ…පෙ… නනු අමතං අසංයොජනියං අගන්ථනියං…පෙ… අසංකිලෙසියන්ති? ආමන්තා. හඤ්චි අමතං අසංයොජනියං…පෙ… අසංකිලෙසියං, නො ච වත රෙ වත්තබ්බෙ – ‘‘අමතාරම්මණං සංයොජන’’න්ති.

අමතං ආරබ්භ රාගො උප්පජ්ජතීති? ආමන්තා. අමතං රාගට්ඨානියං රජනියං කමනියං මදනියං බන්ධනියං මුච්ඡනියන්ති? න හෙවං වත්තබ්බෙ…පෙ… නනු අමතං න රාගට්ඨානියං න රජනියං න කමනියං න මදනියං න බන්ධනියං න මුච්ඡනියන්ති? ආමන්තා. හඤ්චි අමතං න රාගට්ඨානියං න රජනියං න කමනියං න මදනියං න බන්ධනියං න මුච්ඡනියං, නො ච වත රෙ වත්තබ්බෙ – ‘‘අමතං ආරබ්භ රාගො උප්පජ්ජතී’’ති.

අමතං ආරබ්භ දොසො උප්පජ්ජතීති? ආමන්තා. අමතං දොසට්ඨානියං කොපට්ඨානියං පටිඝට්ඨානියන්ති? න හෙවං වත්තබ්බෙ…පෙ… නනු අමතං න දොසට්ඨානියං න කොපට්ඨානියං න පටිඝට්ඨානියන්ති? ආමන්තා. හඤ්චි අමතං න දොසට්ඨානියං න කොපට්ඨානියං න පටිඝට්ඨානියං, නො ච වත රෙ වත්තබ්බෙ – ‘‘අමතං ආරබ්භ දොසො උප්පජ්ජතී’’ති.

අමතං ආරබ්භ මොහො උප්පජ්ජතීති? ආමන්තා. අමතං මොහට්ඨානියං අඤ්ඤාණකරණං අචක්ඛුකරණං පඤ්ඤානිරොධියං විඝාතපක්ඛියං අනිබ්බානසංවත්තනියන්ති? න හෙවං වත්තබ්බෙ…පෙ… නනු අමතං න මොහට්ඨානියං න අඤ්ඤාණකරණං න අචක්ඛුකරණං පඤ්ඤාබුද්ධියං අවිඝාතපක්ඛියං නිබ්බානසංවත්තනියන්ති? ආමන්තා. හඤ්චි අමතං න මොහට්ඨානියං න අඤ්ඤාණකරණං…පෙ… නිබ්බානසංවත්තනියං, නො ච වත රෙ වත්තබ්බෙ – ‘‘අමතං ආරබ්භ මොහො උප්පජ්ජතී’’ති.

550. රූපං ආරබ්භ සංයොජනා උප්පජ්ජන්ති, රූපං සංයොජනියං ගන්ථනියං…පෙ… සංකිලෙසියන්ති? ආමන්තා. අමතං ආරබ්භ සංයොජනා උප්පජ්ජන්ති, අමතං සංයොජනියං…පෙ… සංකිලෙසියන්ති? න හෙවං වත්තබ්බෙ…පෙ….

රූපං ආරබ්භ රාගො උප්පජ්ජති, රූපං රාගට්ඨානියං රජනියං කමනියං මදනියං බන්ධනියං මුච්ඡනියන්ති? ආමන්තා. අමතං ආරබ්භ රාගො උප්පජ්ජති, අමතං රාගට්ඨානියං…පෙ… මුච්ඡනියන්ති? න හෙවං වත්තබ්බෙ…පෙ….

රූපං ආරබ්භ දොසො උප්පජ්ජති, රූපං දොසට්ඨානියං කොපට්ඨානියං පටිඝට්ඨානියන්ති? ආමන්තා. අමතං ආරබ්භ දොසො උප්පජ්ජති, අමතං දොසට්ඨානියං කොපට්ඨානියං පටිඝට්ඨානියන්ති? න හෙවං වත්තබ්බෙ…පෙ….

රූපං ආරබ්භ මොහො උප්පජ්ජති, රූපං මොහට්ඨානියං අඤ්ඤාණකරණං…පෙ… අනිබ්බානසංවත්තනියන්ති? ආමන්තා. අමතං ආරබ්භ මොහො උප්පජ්ජති, අමතං මොහට්ඨානියං අඤ්ඤාණකරණං…පෙ… අනිබ්බානසංවත්තනියන්ති? න හෙවං වත්තබ්බෙ…පෙ….

අමතං ආරබ්භ සංයොජනා උප්පජ්ජන්ති, අමතං අසංයොජනියං අගන්ථනියං අනොඝනියං අයොගනියං අනීවරණියං අපරාමට්ඨං අනුපාදානියං අසංකිලෙසියන්ති? ආමන්තා. රූපං ආරබ්භ සංයොජනා උප්පජ්ජන්ති, රූපං අසංයොජනියං අගන්ථනියං…පෙ… අසංකිලෙසියන්ති? න හෙවං වත්තබ්බෙ…පෙ….

අමතං ආරබ්භ රාගො උප්පජ්ජති, අමතං න රාගට්ඨානියං න රජනියං න කමනියං න මදනියං න බන්ධනියං න මුච්ඡනියන්ති? ආමන්තා. රූපං ආරබ්භ රාගො උප්පජ්ජති, රූපං න රාගට්ඨානියං…පෙ… න මුච්ඡනියන්ති? න හෙවං වත්තබ්බෙ…පෙ….

අමතං ආරබ්භ දොසො උප්පජ්ජති, අමතං න දොසට්ඨානියං න කොපට්ඨානියං න පටිඝට්ඨානියන්ති? ආමන්තා. රූපං ආරබ්භ දොසො උප්පජ්ජති, රූපං න දොසට්ඨානියං න කොපට්ඨානියං න පටිඝට්ඨානියන්ති? න හෙවං වත්තබ්බෙ…පෙ….

අමතං ආරබ්භ මොහො උප්පජ්ජති, අමතං න මොහට්ඨානියං න අඤ්ඤාණකරණං…පෙ… නිබ්බානසංවත්තනියන්ති? ආමන්තා. රූපං ආරබ්භ මොහො උප්පජ්ජති, රූපං න මොහට්ඨානියං න අඤ්ඤාණකරණං…පෙ… නිබ්බානසංවත්තනියන්ති? න හෙවං වත්තබ්බෙ…පෙ….

551. න වත්තබ්බං – ‘‘අමතාරම්මණං සංයොජන’’න්ති? ආමන්තා. නනු වුත්තං භගවතා – ‘‘නිබ්බානං නිබ්බානතො සඤ්ජානාති, නිබ්බානං නිබ්බානතො සඤ්ජානිත්වා නිබ්බානං මඤ්ඤති, නිබ්බානස්මිං මඤ්ඤති, නිබ්බානතො මඤ්ඤති, නිබ්බානං මෙති මඤ්ඤති, නිබ්බානං අභිනන්දතී’’ති [ම. නි. 1.6]! අත්ථෙව සුත්තන්තොති? ආමන්තා. තෙන හි අමතාරම්මණං සංයොජනන්ති.

අමතාරම්මණකථා නිට්ඨිතා.