(80) 8. අරූපෙ රූපකථා

524. අත්ථි රූපං අරූපෙසූති? ආමන්තා. රූපභවො රූපගති රූපසත්තාවාසො රූපසංසාරො රූපයොනි රූපත්තභාවපටිලාභොති? න හෙවං වත්තබ්බෙ…පෙ… නනු අරූපභවො අරූපගති අරූපසත්තාවාසො අරූපසංසාරො අරූපයොනි අරූපත්තභාවපටිලාභොති? ආමන්තා. හඤ්චි අරූපභවො…පෙ… අරූපත්තභාවපටිලාභො, නො ච වත රෙ වත්තබ්බෙ – ‘‘අත්ථි රූපං අරූපෙසූ’’ති.

අත්ථි රූපං අරූපෙසූති? ආමන්තා. පඤ්චවොකාරභවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… නනු චතුවොකාරභවො…පෙ… අත්තභාවපටිලාභොති? ආමන්තා. හඤ්චි චතුවොකාරභවො ගති…පෙ… අත්තභාවපටිලාභො, නො ච වත රෙ වත්තබ්බෙ – ‘‘අත්ථි රූපං අරූපෙසූ’’ති.

525. අත්ථි රූපං රූපධාතුයා, සො ච රූපභවො රූපගති රූපසත්තාවාසො රූපසංසාරො රූපයොනි රූපත්තභාවපටිලාභොති? ආමන්තා. අත්ථි රූපං අරූපෙසු, සො ච රූපභවො රූපගති…පෙ… රූපත්තභාවපටිලාභොති? න හෙවං වත්තබ්බෙ…පෙ… අත්ථි රූපං රූපධාතුයා, සො ච පඤ්චවොකාරභවො ගති…පෙ… අත්තභාවපටිලාභොති? ආමන්තා. අත්ථි රූපං අරූපෙසු, සො ච පඤ්චවොකාරභවො ගති…පෙ… අත්තභාවපටිලාභොති? න හෙවං වත්තබ්බෙ…පෙ…. අත්ථි රූපං අරූපෙසු, සො ච අරූපභවො අරූපගති අරූපසත්තාවාසො අරූපසංසාරො අරූපයොනි අරූපත්තභාවපටිලාභොති? ආමන්තා. අත්ථි රූපං රූපධාතුයා [අරූපධාතුයා (සබ්බත්ථ)], සො ච අරූපභවො අරූපගති…පෙ… අරූපත්තභාවපටිලාභොති? න හෙවං වත්තබ්බෙ…පෙ… අත්ථි රූපං අරූපෙසු, සො ච චතුවොකාරභවො ගති…පෙ… අත්තභාවපටිලාභොති? ආමන්තා. අත්ථි රූපං රූපධාතුයා [අරූපධාතුයා (සබ්බත්ථ)], සො ච චතුවොකාරභවො ගති…පෙ… අත්තභාවපටිලාභොති? න හෙවං වත්තබ්බෙ…පෙ….

526. අත්ථි රූපං අරූපෙසූති? ආමන්තා. නනු රූපානං නිස්සරණං අරූපං [ඉතිවු. 72; අ. නි. 5.200; දී. නි. 3.321] වුත්තං භගවතාති? ආමන්තා. හඤ්චි රූපානං නිස්සරණං අරූපං [ඉතිවු. 72; අ. නි. 5.200; දී. නි. 3.321] වුත්තං භගවතා, නො ච වත රෙ වත්තබ්බෙ – ‘‘අත්ථි රූපං අරූපෙසූ’’ති.

රූපානං නිස්සරණං අරූපං වුත්තං භගවතා, අත්ථි රූපං අරූපෙසූති? ආමන්තා. කාමානං නිස්සරණං නෙක්ඛම්මං වුත්තං භගවතා, අත්ථි නෙක්ඛම්මෙසු කාමා, අත්ථි අනාසවෙසු ආසවා, අත්ථි අපරියාපන්නෙසු පරියාපන්නාති? න හෙවං වත්තබ්බෙ…පෙ….

අරූපෙ රූපකථා නිට්ඨිතා.