(78) 6. අරූපධාතුකථා

517. අරූපිනො ධම්මා අරූපධාතූති? ආමන්තා. වෙදනා භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි වෙදනූපගං කම්මන්ති? න හෙවං වත්තබ්බෙ…පෙ… අත්ථි වෙදනූපගා සත්තාති? න හෙවං වත්තබ්බෙ…පෙ… වෙදනාය සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… වෙදනාය අත්ථි වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… වෙදනා චතුවොකාරභවොති? න හෙවං වත්තබ්බෙ…පෙ….

අරූපධාතු භවො ගති…පෙ… අත්තභාවපටිලාභොති? ආමන්තා. වෙදනා භවො ගති…පෙ… අත්තභාවපටිලාභොති? න හෙවං වත්තබ්බෙ…පෙ… අත්ථි අරූපධාතූපගං කම්මන්ති? ආමන්තා. අත්ථි වෙදනූපගං කම්මන්ති? න හෙවං වත්තබ්බෙ…පෙ… අත්ථි අරූපධාතූපගා සත්තාති? ආමන්තා. අත්ථි වෙදනූපගා සත්තාති? න හෙවං වත්තබ්බෙ…පෙ….

අරූපධාතුයා සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. වෙදනාය සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… අරූපධාතුයා අත්ථි වෙදනා සඤ්ඤා සඞ්ඛාරා විඤ්ඤාණන්ති? ආමන්තා. වෙදනාය අත්ථි වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… අරූපධාතු චතුවොකාරභවොති? ආමන්තා. වෙදනා චතුවොකාරභවොති? න හෙවං වත්තබ්බෙ…පෙ….

518. අරූපිනො ධම්මා අරූපධාතු, කාමධාතුයා අත්ථි වෙදනා සඤ්ඤා සඞ්ඛාරා විඤ්ඤාණන්ති? ආමන්තා. සාව කාමධාතු, සා අරූපධාතූති? න හෙවං වත්තබ්බෙ…පෙ… සාව කාමධාතු, සා අරූපධාතූති? ආමන්තා. කාමභවෙන සමන්නාගතො පුග්ගලො ද්වීහි භවෙහි සමන්නාගතො හොති – කාමභවෙන ච අරූපභවෙන චාති? න හෙවං වත්තබ්බෙ…පෙ….

රූපිනො ධම්මා රූපධාතු, අරූපිනො ධම්මා අරූපධාතු, කාමධාතුයා අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? ආමන්තා. සාව කාමධාතු, සා රූපධාතු, සා අරූපධාතූති? න හෙවං වත්තබ්බෙ…පෙ… සාව කාමධාතු, සා රූපධාතු, සා අරූපධාතූති? ආමන්තා. කාමභවෙන සමන්නාගතො පුග්ගලො තීහි භවෙහි සමන්නාගතො හොති – කාමභවෙන ච රූපභවෙන ච අරූපභවෙන චාති? න හෙවං වත්තබ්බෙ…පෙ….

අරූපධාතුකථා නිට්ඨිතා.