(75) 3. කාමගුණකථා

510. පඤ්චෙව කාමගුණා කාමධාතූති? ආමන්තා. නනු අත්ථි තප්පටිසඤ්ඤුත්තො ඡන්දොති? ආමන්තා. හඤ්චි අත්ථි තප්පටිසඤ්ඤුත්තො ඡන්දො, නො ච වත රෙ වත්තබ්බෙ – ‘‘පඤ්චෙව කාමගුණා කාමධාතූ’’ති. නනු අත්ථි තප්පටිසඤ්ඤුත්තො රාගො තප්පටිසඤ්ඤුත්තො ඡන්දො තප්පටිසඤ්ඤුත්තො ඡන්දරාගො තප්පටිසඤ්ඤුත්තො සඞ්කප්පො තප්පටිසඤ්ඤුත්තො රාගො තප්පටිසඤ්ඤුත්තො සඞ්කප්පරාගො තප්පටිසඤ්ඤුත්තා පීති තප්පටිසඤ්ඤුත්තං සොමනස්සං තප්පටිසඤ්ඤුත්තං පීතිසොමනස්සන්ති? ආමන්තා. හඤ්චි අත්ථි තප්පටිසඤ්ඤුත්තං පීතිසොමනස්සං, නො ච වත රෙ වත්තබ්බෙ – ‘‘පඤ්චෙව කාමගුණා කාමධාතූ’’ති.

පඤ්චෙව කාමගුණා කාමධාතූති? ආමන්තා. මනුස්සානං චක්ඛු න කාමධාතූති? න හෙවං වත්තබ්බෙ…පෙ… මනුස්සානං සොතං…පෙ… මනුස්සානං ඝානං…පෙ… මනුස්සානං ජිව්හා…පෙ… මනුස්සානං කායො…පෙ… මනුස්සානං මනො න කාමධාතූති? න හෙවං වත්තබ්බෙ…පෙ….

මනුස්සානං මනො න කාමධාතූති? ආමන්තා. නනු වුත්තං භගවතා –

‘‘පඤ්ච කාමගුණා ලොකෙ, මනොච්ඡට්ඨා පවෙදිතා;

එත්ථ ඡන්දං විරාජෙත්වා, එවං දුක්ඛා පමුච්චතී’’ති [සු. නි. 173; සං. නි. 1.30].

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘මනුස්සානං මනො න කාමධාතූ’’ති.

511. පඤ්චෙව කාමගුණා කාමධාතූති? ආමන්තා. කාමගුණා භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි කාමගුණූපගං කම්මන්ති? න හෙවං වත්තබ්බෙ…පෙ… අත්ථි කාමගුණූපගා සත්තාති? න හෙවං වත්තබ්බෙ…පෙ… කාමගුණෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… කාමගුණෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… කාමගුණා පඤ්චවොකාරභවොති? න හෙවං වත්තබ්බෙ…පෙ… කාමගුණෙ සම්මාසම්බුද්ධා උප්පජ්ජන්ති, පච්චෙකසම්බුද්ධා උප්පජ්ජන්ති, සාවකයුගං උප්පජ්ජතීති? න හෙවං වත්තබ්බෙ…පෙ….

කාමධාතු භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? ආමන්තා. කාමගුණා භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි කාමධාතූපගං කම්මන්ති? ආමන්තා. අත්ථි කාමගුණූපගං කම්මන්ති? න හෙවං වත්තබ්බෙ…පෙ… අත්ථි කාමධාතූපගා සත්තාති? ආමන්තා. අත්ථි කාමගුණූපගා සත්තාති? න හෙවං වත්තබ්බෙ…පෙ….

කාමධාතුයා සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. කාමගුණෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ …පෙ… කාමධාතුයා අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? ආමන්තා. කාමගුණෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… කාමධාතු පඤ්චවොකාරභවොති? ආමන්තා. කාමගුණා පඤ්චවොකාරභවොති? න හෙවං වත්තබ්බෙ…පෙ… කාමධාතුයා සම්මාසම්බුද්ධා උප්පජ්ජන්ති, පච්චෙකසබුද්ධා උප්පජ්ජන්ති, සාවකයුගං උප්පජ්ජතීති? ආමන්තා. කාමගුණෙ සම්මාසම්බුද්ධා උප්පජ්ජන්ති, පච්චෙකසම්බුද්ධා උප්පජ්ජන්ති, සාවකයුගං උප්පජ්ජතීති? න හෙවං වත්තබ්බෙ…පෙ….

512. න වත්තබ්බං – ‘‘පඤ්චෙව කාමගුණා කාමධාතූ’’ති? ආමන්තා. නනු වුත්තං භගවතා – ‘‘පඤ්චිමෙ, භික්ඛවෙ, කාමගුණා! කතමෙ පඤ්ච? චක්ඛුවිඤ්ඤෙය්‍යා රූපා ඉට්ඨා කන්තා මනාපා පියරූපා කාමූපසංහිතා රජනීයා, සොතවිඤ්ඤෙය්‍යා සද්දා…පෙ… ඝානවිඤ්ඤෙය්‍යා ගන්ධා…පෙ… ජිව්හාවිඤ්ඤෙය්‍යා රසා…පෙ… කායවිඤ්ඤෙය්‍යා ඵොට්ඨබ්බා ඉට්ඨා කන්තා මනාපා පියරූපා කාමූපසංහිතා රජනීයා – ඉමෙ ඛො, භික්ඛවෙ, පඤ්ච කාමගුණා’’ති. අත්ථෙව සුත්තන්තොති? ආමන්තා. තෙන හි පඤ්චෙව කාමගුණා කාමධාතූති.

කාමගුණකථා නිට්ඨිතා.