8. අට්ඨමවග්ගො

(76) 4. කාමකථා

513. පඤ්චෙවායතනා කාමාති? ආමන්තා. නනු අත්ථි තප්පටිසංයුත්තො ඡන්දොති? ආමන්තා. හඤ්චි අත්ථි තප්පටිසංයුත්තො ඡන්දො, නො ච වත රෙ වත්තබ්බෙ – ‘‘පඤ්චෙවායතනා කාමා’’ති. නනු අත්ථි තප්පටිසංයුත්තො රාගො තප්පටිසංයුත්තො ඡන්දො තප්පටිසංයුත්තො ඡන්දරාගො තප්පටිසංයුත්තො සඞ්කප්පො තප්පටිසංයුත්තො රාගො තප්පටිසංයුත්තො සඞ්කප්පරාගො තප්පටිසංයුත්තා පීති තප්පටිසංයුත්තං සොමනස්සං තප්පටිසංයුත්තං පීතිසොමනස්සන්ති? ආමන්තා. හඤ්චි අත්ථි තප්පටිසංයුත්තං පීතිසොමනස්සං, නො ච වත රෙ වත්තබ්බෙ – ‘‘පඤ්චෙවායතනා කාමා’’ති.

514. න වත්තබ්බං – ‘‘පඤ්චෙවායතනා කාමා’’ති? ආමන්තා. නනු වුත්තං භගවතා – ‘‘පඤ්චිමෙ, භික්ඛවෙ, කාමගුණා! කතමෙ පඤ්ච? චක්ඛුවිඤ්ඤෙය්‍යා රූපා…පෙ… කායවිඤ්ඤෙය්‍යා ඵොට්ඨබ්බා ඉට්ඨා කන්තා මනාපා පියරූපා කාමූපසංහිතා රජනීයා – ඉමෙ ඛො, භික්ඛවෙ, පඤ්ච කාමගුණා’’ති. අත්ථෙව සුත්තන්තොති? ආමන්තා. තෙන හි පඤ්චෙවායතනා කාමාති.

පඤ්චෙවායතනා කාමාති? ආමන්තා. නනු වුත්තං භගවතා – ‘‘පඤ්චිමෙ, භික්ඛවෙ, කාමගුණා! කතමෙ පඤ්ච? චක්ඛුවිඤ්ඤෙය්‍යා රූපා…පෙ… කායවිඤ්ඤෙය්‍යා ඵොට්ඨබ්බා ඉට්ඨා කන්තා මනාපා පියරූපා කාමූපසංහිතා රජනීයා – ඉමෙ ඛො, භික්ඛවෙ, පඤ්ච කාමගුණා. අපි ච, භික්ඛවෙ, නෙතෙ කාමා කාමගුණා නාමෙතෙ අරියස්ස විනයෙ වුච්ච’’න්ති –

‘‘සඞ්කප්පරාගො පුරිසස්ස කාමො,

න තෙ කාමා යානි චිත්‍රානි ලොකෙ;

සඞ්කප්පරාගො පුරිසස්ස කාමො,

තිට්ඨන්ති චිත්‍රානි තථෙව ලොකෙ;

අථෙත්ථ ධීරා විනයන්ති ඡන්ද’’න්ති [අ. නි. 6.63 නිබ්බෙධිකසුත්තෙ].

අත්ථෙව සුත්තන්තොති? ආමන්තා. තෙන හි න වත්තබ්බං – ‘‘පඤ්චෙවායතනා කාමා’’ති.

කාමකථා නිට්ඨිතා.