8. අට්ඨමවග්ගො
(82) 10. ජීවිතින්ද්‍රියකථා
540. නත්ථි රූපජීවිතින්ද්‍රියන්ති? ආමන්තා. නත්ථි රූපීනං ධම්මානං ආයු ඨිති යපනා යාපනා ඉරියනා වත්තනා පාලනාති? න හෙවං වත්තබ්බෙ…පෙ… අත්ථි රූපීනං ධම්මානං ආයු ඨිති යපනා යාපනා ඉරියනා වත්තනා පාලනාති? ආමන්තා. හඤ්චි අත්ථි රූපීනං ධම්මානං ආයු ඨිති යපනා යාපනා ඉරියනා වත්තනා පාලනා, නො ච වත රෙ වත්තබ්බෙ – ‘‘නත්ථි රූපජීවිතින්ද්‍රිය’’න්ති.
අත්ථි අරූපීනං ධම්මානං ආයු ඨිති යපනා යාපනා ඉරියනා වත්තනා පාලනා, අත්ථි අරූපජීවිතින්ද්‍රියන්ති? ආමන්තා. අත්ථි රූපීනං ධම්මානං ආයු ඨිති යපනා යාපනා ඉරියනා වත්තනා පාලනා, අත්ථි රූපජීවිතින්ද්‍රියන්ති? න හෙවං වත්තබ්බෙ…පෙ… අත්ථි රූපීනං ධම්මානං ආයු ඨිති යපනා යාපනා ඉරියනා වත්තනා පාලනා, නත්ථි රූපජීවිතින්ද්‍රියන්ති? ආමන්තා. අත්ථි අරූපීනං ධම්මානං ආයු ඨිති යපනා යාපනා ඉරියනා වත්තනා පාලනා, නත්ථි අරූපජීවිතින්ද්‍රියන්ති? න හෙවං වත්තබ්බෙ…පෙ….
අරූපීනං ධම්මානං ආයු අරූපජීවිතින්ද්‍රියන්ති? ආමන්තා. රූපීනං ධම්මානං ආයු රූපජීවිතින්ද්‍රියන්ති? න හෙවං වත්තබ්බෙ…පෙ… රූපීනං ධම්මානං ආයු න වත්තබ්බං – ‘‘රූපජීවිතින්ද්‍රිය’’න්ති? ආමන්තා. අරූපීනං ධම්මානං ආයු න වත්තබ්බං – ‘‘අරූපජීවිතින්ද්‍රිය’’න්ති? න හෙවං වත්තබ්බෙ…පෙ….
541. රූපීනං ධම්මානං ආයු අරූපජීවිතින්ද්‍රියන්ති? ආමන්තා. අරූපීනං ධම්මානං ආයු රූපජීවිතින්ද්‍රියන්ති? න හෙවං වත්තබ්බෙ…පෙ….
අරූපීනං ධම්මානං ආයු න වත්තබ්බං – ‘‘රූපජීවිතින්ද්‍රිය’’න්ති? ආමන්තා. රූපීනං ධම්මානං ආයු න වත්තබ්බං – ‘‘අරූපජීවිතින්ද්‍රිය’’න්ති? න හෙවං වත්තබ්බෙ…පෙ….
රූපීනඤ්ච අරූපීනඤ්ච ධම්මානං ආයු අරූපජීවිතින්ද්‍රියන්ති? ආමන්තා. රූපීනඤ්ච අරූපීනඤ්ච ධම්මානං ආයු රූපජීවිතින්ද්‍රියන්ති? න හෙවං වත්තබ්බෙ…පෙ….
රූපීනඤ්ච අරූපීනඤ්ච ධම්මානං ආයු න වත්තබ්බං – ‘‘රූපජීවිතින්ද්‍රිය’’න්ති? ආමන්තා. රූපීනඤ්ච අරූපීනඤ්ච ධම්මානං ආයු න වත්තබ්බං – ‘‘අරූපජීවිතින්ද්‍රිය’’න්ති? න හෙවං වත්තබ්බෙ…පෙ… නත්ථි රූපජීවිතින්ද්‍රියන්ති? ආමන්තා. නිරොධං සමාපන්නස්ස නත්ථි ජීවිතින්ද්‍රියන්ති? න හෙවං වත්තබ්බෙ…පෙ….
542. නිරොධං සමාපන්නස්ස අත්ථි ජීවිතින්ද්‍රියන්ති? ආමන්තා. හඤ්චි නිරොධං සමාපන්නස්ස අත්ථි ජීවිතින්ද්‍රියං, නො ච වත රෙ වත්තබ්බෙ – ‘‘නත්ථි රූපජීවිතින්ද්‍රිය’’න්ති.
නිරොධං සමාපන්නස්ස අත්ථි ජීවිතින්ද්‍රියන්ති? ආමන්තා. කතමක්ඛන්ධපරියාපන්නන්ති? සඞ්ඛාරක්ඛන්ධපරියාපන්නන්ති. නිරොධං සමාපන්නස්ස අත්ථි සඞ්ඛාරක්ඛන්ධොති? න හෙවං වත්තබ්බෙ…පෙ….
නිරොධං සමාපන්නස්ස අත්ථි සඞ්ඛාරක්ඛන්ධොති? ආමන්තා. නිරොධං සමාපන්නස්ස අත්ථි වෙදනාක්ඛන්ධො…පෙ… සඤ්ඤාක්ඛන්ධො…පෙ… විඤ්ඤාණක්ඛන්ධොති? න හෙවං වත්තබ්බෙ…පෙ….
නිරොධං සමාපන්නස්ස අත්ථි වෙදනාක්ඛන්ධො…පෙ… සඤ්ඤාක්ඛන්ධො…පෙ… විඤ්ඤාණක්ඛන්ධොති? ආමන්තා. න නිරොධං සමාපන්නොති? න හෙවං වත්තබ්බෙ…පෙ….
543. නත්ථි රූපජීවිතින්ද්‍රියන්ති? ආමන්තා. අසඤ්ඤසත්තානං නත්ථි ජීවිතින්ද්‍රියන්ති? න හෙවං වත්තබ්බෙ…පෙ….
අසඤ්ඤසත්තානං අත්ථි ජීවිතින්ද්‍රියන්ති? ආමන්තා. හඤ්චි අසඤ්ඤසත්තානං අත්ථි ජීවිතින්ද්‍රියං, නො ච වත රෙ වත්තබ්බෙ – ‘‘නත්ථි රූපජීවිතින්ද්‍රිය’’න්ති. අසඤ්ඤසත්තානං අත්ථි ජීවිතින්ද්‍රියන්ති? ආමන්තා. කතමක්ඛන්ධපරියාපන්නන්ති? සඞ්ඛාරක්ඛන්ධපරියාපන්නන්ති. අසඤ්ඤසත්තානං අත්ථි සඞ්ඛාරක්ඛන්ධොති? න හෙවං වත්තබ්බෙ…පෙ….
අසඤ්ඤසත්තානං අත්ථි සඞ්ඛාරක්ඛන්ධොති? ආමන්තා. අසඤ්ඤසත්තානං අත්ථි වෙදනාක්ඛන්ධො…පෙ… සඤ්ඤාක්ඛන්ධො…පෙ… විඤ්ඤාණක්ඛන්ධොති? න හෙවං වත්තබ්බෙ…පෙ….
අසඤ්ඤසත්තානං අත්ථි වෙදනාක්ඛන්ධො…පෙ… සඤ්ඤාක්ඛන්ධො…පෙ… විඤ්ඤාණක්ඛන්ධොති? ආමන්තා. පඤ්චවොකාරභවොති? න හෙවං වත්තබ්බෙ…පෙ….
544. උපපත්තෙසියෙන චිත්තෙන සමුට්ඨිතං ජීවිතින්ද්‍රියං උපපත්තෙසියෙ චිත්තෙ භිජ්ජමානෙ එකදෙසං භිජ්ජතීති? ආමන්තා. උපපත්තෙසියෙන චිත්තෙන සමුට්ඨිතො ඵස්සො උපපත්තෙසියෙ චිත්තෙ භිජ්ජමානෙ එකදෙසො භිජ්ජතීති? න හෙවං වත්තබ්බෙ…පෙ….
උපපත්තෙසියෙන චිත්තෙන සමුට්ඨිතො ඵස්සො උපපත්තෙසියෙ චිත්තෙ භිජ්ජමානෙ අනවසෙසො භිජ්ජතීති? ආමන්තා. උපපත්තෙසියෙන චිත්තෙන සමුට්ඨිතං ජීවිතින්ද්‍රියං උපපත්තෙසියෙ චිත්තෙ භිජ්ජමානෙ අනවසෙසං භිජ්ජතීති? න හෙවං වත්තබ්බෙ…පෙ….
545. ද්වෙ ජීවිතින්ද්‍රියානීති? ආමන්තා. ද්වීහි ජීවිතෙහි ජීවති, ද්වීහි මරණෙහි මීයතීති? ආමන්තා [න හෙවං වත්තබ්බෙ (ස්‍යා. කං. පී.)].
ජීවිතින්ද්‍රියකථා නිට්ඨිතා.