8. අට්ඨමවග්ගො

(83) 11. කම්මහෙතුකථා

546. කම්මහෙතු අරහා අරහත්තා පරිහායතීති? ආමන්තා. කම්මහෙතු සොතාපන්නො සොතාපත්තිඵලා පරිහායතීති? න හෙවං වත්තබ්බෙ…පෙ… කම්මහෙතු අරහා අරහත්තා පරිහායතීති? ආමන්තා. කම්මහෙතු සකදාගාමී…පෙ… අනාගාමී අනාගාමිඵලා පරිහායතීති? න හෙවං වත්තබ්බෙ…පෙ….

කම්මහෙතු සොතාපන්නො සොතාපත්තිඵලා න පරිහායතීති? ආමන්තා. කම්මහෙතු අරහා අරහත්තා න පරිහායතීති? න හෙවං වත්තබ්බෙ …පෙ… කම්මහෙතු සකදාගාමී…පෙ… අනාගාමී අනාගාමිඵලා න පරිහායතීති? ආමන්තා. කම්මහෙතු අරහා අරහත්තා න පරිහායතීති? න හෙවං වත්තබ්බෙ…පෙ….

කම්මහෙතු අරහා අරහත්තා පරිහායතීති? ආමන්තා. පාණාතිපාතකම්මස්ස හෙතූති? න හෙවං වත්තබ්බෙ…පෙ… අදින්නාදානකම්මස්ස හෙතු…පෙ… කාමෙසුමිච්ඡාචාරකම්මස්ස හෙතු… මුසාවාදකම්මස්ස හෙතු… පිසුණවාචාකම්මස්ස හෙතු… ඵරුසවාචාකම්මස්ස හෙතු… සම්ඵප්පලාපකම්මස්ස හෙතු… මාතුඝාතකම්මස්ස [මාතුඝාතකකම්මස්ස (ස්‍යා.), මාතුඝාතිකම්මස්ස (ක.) තථා පිතුඝාතඅරහන්තඝාතකම්මස්සාතිපදෙසු] හෙතු… පිතුඝාතකම්මස්ස හෙතු… අරහන්තඝාතකම්මස්ස හෙතු… රුහිරුප්පාදකම්මස්ස හෙතු…පෙ… සඞ්ඝභෙදකම්මස්ස හෙතූති? න හෙවං වත්තබ්බෙ…පෙ….

කතමස්ස කම්මස්ස හෙතූති? හන්ද හි අරහන්තානං අබ්භාචික්ඛතීති. අරහන්තානං අබ්භාචික්ඛනකම්මස්ස හෙතු අරහා අරහත්තා පරිහායතීති? ආමන්තා. යෙ කෙචි අරහන්තානං අබ්භාචික්ඛන්ති, සබ්බෙ තෙ අරහත්තං සච්ඡිකරොන්තීති? න හෙවං වත්තබ්බෙ…පෙ….

කම්මහෙතුකථා නිට්ඨිතා.

අට්ඨමවග්ගො.

තස්සුද්දානං –

ඡ ගතියො, අන්තරාභවො, පඤ්චෙව කාමගුණා කාමධාතු, පඤ්චෙව ආයතනා කාමා, රූපිනො ධම්මා රූපධාතු, අරූපිනො ධම්මා අරූපධාතු, සළායතනිකො අත්තභාවො රූපධාතුයා, අත්ථි රූපං අරූපෙසු, රූපං කම්මං, රූපං ජීවිතං, කම්මහෙතුකා පරිහායතීති.