(73) 1. ඡගතිකථා

503. ඡ ගතියොති? ආමන්තා. නනු පඤ්ච ගතියො වුත්තා භගවතා – නිරයො, තිරච්ඡානයොනි, පෙත්තිවිසයො, මනුස්සා, දෙවාති [ම. නි. 1.153]? ආමන්තා. හඤ්චි පඤ්ච ගතියො වුත්තා භගවතා – නිරයො, තිරච්ඡානයොනි, පෙත්තිවිසයො, මනුස්සා, දෙවා; නො ච වත රෙ වත්තබ්බෙ – ‘‘ඡ ගතියො’’ති.

ඡ ගතියොති? ආමන්තා. නනු කාලකඤ්චිකා [කාලකඤ්ජිකා (සී. ස්‍යා. කං.), කාළකඤ්ජකා (පී.)] සුරා පෙතානං සමානවණ්ණා සමානභොගා සමානාහාරා සමානායුකා පෙතෙහි සහ ආවාහවිවාහං ගච්ඡන්තීති? ආමන්තා. හඤ්චි කාලකඤ්චිකා අසුරා පෙතානං සමානවණ්ණා සමානභොගා සමානාහාරා සමානායුකා පෙතෙහි සහ ආවාහවිවාහං ගච්ඡන්ති, නො ච වත රෙ වත්තබ්බෙ – ‘‘ඡ ගතියො’’ති.

ඡ ගතියොති? ආමන්තා. නනු වෙපචිත්තිපරිසා දෙවානං සමානවණ්ණා සමානභොගා සමානාහාරා සමානායුකා දෙවෙහි සහ ආවාහවිවාහං ගච්ඡන්තීති? ආමන්තා. හඤ්චි වෙපචිත්තිපරිසා දෙවානං සමානවණ්ණා සමානභොගා සමානාහාරා සමානායුකා දෙවෙහි සහ ආවාහවිවාහං ගච්ඡන්ති, නො ච වත රෙ වත්තබ්බෙ – ‘‘ඡ ගතියො’’ති.

ඡ ගතියොති? ආමන්තා. නනු වෙපචිත්තිපරිසා පුබ්බදෙවාති? ආමන්තා. හඤ්චි වෙපචිත්තිපරිසා පුබ්බදෙවා, නො ච වත රෙ වත්තබ්බෙ – ‘‘ඡ ගතියො’’ති.

504. න වත්තබ්බං – ‘‘ඡ ගතියො’’ති? ආමන්තා. නනු අත්ථි අසුරකායොති, ආමන්තා. හඤ්චි අත්ථි අසුරකායො, තෙන වත රෙ වත්තබ්බෙ – ‘‘ඡ ගතියො’’ති.

ඡගතිකථා නිට්ඨිතා.