8. අට්ඨමවග්ගො

(74) 2. අන්තරාභවකථා

505. අත්ථි අන්තරාභවොති? ආමන්තා. කාමභවොති? න හෙවං වත්තබ්බෙ…පෙ… අත්ථි අන්තරාභවොති? ආමන්තා. රූපභවොති? න හෙවං වත්තබ්බෙ…පෙ… අත්ථි අන්තරාභවොති? ආමන්තා. අරූපභවොති? න හෙවං වත්තබ්බෙ…පෙ… අත්ථි අන්තරාභවොති? ආමන්තා. කාමභවස්ස ච රූපභවස්ස ච අන්තරෙ අත්ථි අන්තරාභවොති? න හෙවං වත්තබ්බෙ…පෙ… අත්ථි අන්තරාභවොති? ආමන්තා. රූපභවස්ස ච අරූපභවස්ස ච අන්තරෙ අත්ථි අන්තරාභවොති? න හෙවං වත්තබ්බෙ…පෙ….

කාමභවස්ස ච රූපභවස්ස ච අන්තරෙ නත්ථි අන්තරාභවොති? ආමන්තා. හඤ්චි කාමභවස්ස ච රූපභවස්ස ච අන්තරෙ නත්ථි අන්තරාභවො, නො ච වත රෙ වත්තබ්බෙ – ‘‘අත්ථි අන්තරාභවො’’ති. රූපභවස්ස ච අරූපභවස්ස ච අන්තරෙ නත්ථි අන්තරාභවොති? ආමන්තා. හඤ්චි රූපභවස්ස ච අරූපභවස්ස ච අන්තරෙ නත්ථි අන්තරාභවො, නො ච වත රෙ වත්තබ්බෙ – ‘‘අත්ථි අන්තරාභවො’’ති.

506. අත්ථි අන්තරාභවොති? ආමන්තා. පඤ්චමී සා යොනි, ඡට්ඨමී සා ගති, අට්ඨමී සා විඤ්ඤාණට්ඨිති, දසමො සො සත්තාවාසොති? න හෙවං වත්තබ්බෙ…පෙ… අත්ථි අන්තරාභවොති? ආමන්තා. අන්තරාභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි අන්තරාභවූපගං කම්මන්ති? න හෙවං වත්තබ්බෙ…පෙ… අත්ථි අන්තරාභවූපගා සත්තාති? න හෙවං වත්තබ්බෙ…පෙ… අන්තරාභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… අන්තරාභවෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… අන්තරාභවො පඤ්චවොකාරභවොති? න හෙවං වත්තබ්බෙ…පෙ….

507. අත්ථි කාමභවො, කාමභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? ආමන්තා. අත්ථි අන්තරාභවො, අන්තරාභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි කාමභවූපගං කම්මන්ති? ආමන්තා. අත්ථි අන්තරාභවූපගං කම්මන්ති? න හෙවං වත්තබ්බෙ…පෙ… අත්ථි කාමභවූපගා සත්තාති? ආමන්තා. අත්ථි අන්තරාභවූපගා සත්තාති? න හෙවං වත්තබ්බෙ…පෙ… කාමභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. අන්තරාභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… කාමභවෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? ආමන්තා. අන්තරාභවෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… කාමභවො පඤ්චවොකාරභවොති? ආමන්තා. අන්තරාභවො පඤ්චවොකාරභවොති? න හෙවං වත්තබ්බෙ…පෙ….

අත්ථි රූපභවො, රූපභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? ආමන්තා. අත්ථි අන්තරාභවො, අන්තරාභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි රූපභවූපගං කම්මන්ති? ආමන්තා. අත්ථි අන්තරාභවූපගං කම්මන්ති? න හෙවං වත්තබ්බෙ…පෙ… අත්ථි රූපභවූපගා සත්තාති? ආමන්තා. අත්ථි අන්තරාභවූපගා සත්තාති? න හෙවං වත්තබ්බෙ…පෙ… රූපභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. අන්තරාභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… රූපභවෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? ආමන්තා. අන්තරාභවෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… රූපභවො පඤ්චවොකාරභවොති? ආමන්තා. අන්තරාභවො පඤ්චවොකාරභවොති? න හෙවං වත්තබ්බෙ…පෙ….

අත්ථි අරූපභවො, අරූපභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? ආමන්තා. අත්ථි අන්තරාභවො, අන්තරාභවො භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි අරූපභවූපගං කම්මන්ති? ආමන්තා. අත්ථි අන්තරාභවූපගං කම්මන්ති? න හෙවං වත්තබ්බෙ…පෙ… අත්ථි අරූපභවූපගා සත්තාති? ආමන්තා. අත්ථි අන්තරාභවූපගා සත්තාති? න හෙවං වත්තබ්බෙ…පෙ… අරූපභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. අන්තරාභවෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… අරූපභවෙ අත්ථි වෙදනා සඤ්ඤා සඞ්ඛාරා විඤ්ඤාණන්ති? ආමන්තා. අන්තරාභවෙ අත්ථි වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… අරූපභවො චතුවොකාරභවොති? ආමන්තා. අන්තරාභවො චතුවොකාරභවොති? න හෙවං වත්තබ්බෙ…පෙ….

508. අත්ථි අන්තරාභවොති? ආමන්තා. සබ්බෙසඤ්ඤෙව සත්තානං අත්ථි අන්තරාභවොති? න හෙවං වත්තබ්බෙ …පෙ… සබ්බෙසඤ්ඤෙව සත්තානං නත්ථි අන්තරාභවොති? ආමන්තා. හඤ්චි සබ්බෙසඤ්ඤෙව සත්තානං නත්ථි අන්තරාභවො, නො ච වත රෙ වත්තබ්බෙ – ‘‘අත්ථි අන්තරාභවො’’ති.

අත්ථි අන්තරාභවොති? ආමන්තා. ආනන්තරියස්ස පුග්ගලස්ස අත්ථි අන්තරාභවොති? න හෙවං වත්තබ්බෙ…පෙ… ආනන්තරියස්ස පුග්ගලස්ස නත්ථි අන්තරාභවොති? ආමන්තා. හඤ්චි ආනන්තරියස්ස පුග්ගලස්ස නත්ථි අන්තරාභවො, නො ච වත රෙ වත්තබ්බෙ – ‘‘අත්ථි අන්තරාභවො’’ති.

න ආනන්තරියස්ස පුග්ගලස්ස අත්ථි අන්තරාභවොති? ආමන්තා. ආනන්තරියස්ස පුග්ගලස්ස අත්ථි අන්තරාභවොති? න හෙවං වත්තබ්බෙ…පෙ… ආනන්තරියස්ස පුග්ගලස්ස නත්ථි අන්තරාභවොති? ආමන්තා. න ආනන්තරියස්ස පුග්ගලස්ස නත්ථි අන්තරාභවොති? න හෙවං වත්තබ්බෙ…පෙ… නිරයූපගස්ස පුග්ගලස්ස…පෙ… අසඤ්ඤසත්තූපගස්ස පුග්ගලස්ස …පෙ… අරූපූපගස්ස පුග්ගලස්ස අත්ථි අන්තරාභවොති? න හෙවං වත්තබ්බෙ…පෙ… අරූපූපගස්ස පුග්ගලස්ස නත්ථි අන්තරාභවොති? ආමන්තා. හඤ්චි අරූපූපගස්ස පුග්ගලස්ස නත්ථි අන්තරාභවො, නො ච වත රෙ වත්තබ්බෙ – ‘‘අත්ථි අන්තරාභවො’’ති.

න අරූපූපගස්ස පුග්ගලස්ස අත්ථි අන්තරාභවොති? ආමන්තා. අරූපූපගස්ස පුග්ගලස්ස අත්ථි අන්තරාභවොති? න හෙවං වත්තබ්බෙ…පෙ… අරූපූපගස්ස පුග්ගලස්ස නත්ථි අන්තරාභවොති? ආමන්තා. න අරූපූපගස්ස පුග්ගලස්ස නත්ථි අන්තරාභවොති? න හෙවං වත්තබ්බෙ…පෙ….

509. න වත්තබ්බං අත්ථි අන්තරාභවොති? ආමන්තා. නනු අන්තරාපරිනිබ්බායී පුග්ගලො අත්ථීති? ආමන්තා. හඤ්චි අන්තරාපරිනිබ්බායී පුග්ගලො අත්ථි, තෙන වත රෙ [නො ච වත රෙ (සී. ක.), නො වත රෙ (ස්‍යා.)] වත්තබ්බෙ – ‘‘අත්ථි අන්තරාභවො’’ති.

අන්තරාපරිනිබ්බායී පුග්ගලො අත්ථීති කත්වා අත්ථි අන්තරාභවොති? ආමන්තා. උපහච්චපරිනිබ්බායී පුග්ගලො අත්ථීති කත්වා අත්ථි උපහච්චභවොති? න හෙවං වත්තබ්බෙ…පෙ… අන්තරාපරිනිබ්බායී පුග්ගලො අත්ථීති කත්වා අත්ථි අන්තරාභවොති? ආමන්තා. අසඞ්ඛාරපරිනිබ්බායී පුග්ගලො…පෙ… සසඞ්ඛාරපරිනිබ්බායී පුග්ගලො අත්ථීති කත්වා අත්ථි සසඞ්ඛාරභවොති? න හෙවං වත්තබ්බෙ…පෙ….

අන්තරාභවකථා නිට්ඨිතා.