(68) 6. ඉතොදින්නකථා

488. ඉතො දින්නෙන තත්ථ යාපෙන්තීති? ආමන්තා. ඉතො චීවරං දෙන්ති තං චීවරං තත්ථ පරිභුඤ්ජන්තීති? න හෙවං වත්තබ්බෙ…පෙ… ඉතො පිණ්ඩපාතං දෙන්ති, ඉතො සෙනාසනං දෙන්ති, ඉතො ගිලානපච්චයභෙසජ්ජපරික්ඛාරං දෙන්ති, ඉතො ඛාදනීයං දෙන්ති, ඉතො භොජනීයං දෙන්ති, ඉතො පානීයං දෙන්ති; තං පානීයං තත්ථ පරිභුඤ්ජන්තීති? න හෙවං වත්තබ්බෙ…පෙ….

ඉතො දින්නෙන තත්ථ යාපෙන්තීති? ආමන්තා. අඤ්ඤො අඤ්ඤස්ස කාරකො පරකතං සුඛදුක්ඛං අඤ්ඤො කරොති, අඤ්ඤො පටිසංවෙදෙතීති? න හෙවං වත්තබ්බෙ…පෙ….

489. න වත්තබ්බං – ‘‘ඉතො දින්නෙන තත්ථ යාපෙන්තී’’ති? ආමන්තා. නනු පෙතා අත්තනො අත්ථාය දානං දෙන්තං අනුමොදෙන්ති, චිත්තං පසාදෙන්ති, පීතිං උප්පාදෙන්ති, සොමනස්සං පටිලභන්තීති? ආමන්තා. හඤ්චි පෙතා අත්තනො අත්ථාය දානං දෙන්තං අනුමොදෙන්ති, චිත්තං පසාදෙන්ති, පීතිං උප්පාදෙන්ති, සොමනස්සං පටිලභන්ති; තෙන වත රෙ වත්තබ්බෙ – ‘‘ඉතො දින්නෙන තත්ථ යාපෙන්තී’’ති.

490. න වත්තබ්බං – ‘‘ඉතො දින්නෙන තත්ථ යාපෙන්තී’’ති? ආමන්තා. නනු වුත්තං භගවතා –

‘‘උන්නමෙ උදකං වුට්ඨං, යථානින්නං පවත්තති;

එවමෙව ඉතො දින්නං, පෙතානං උපකප්පති.

‘‘යථා වාරිවහා පූරා, පරිපූරෙන්ති සාගරං;

එවමෙව ඉතො දින්නං, පෙතානං උපකප්පති.

‘‘න හි තත්ථ කසී අත්ථි, ගොරක්ඛෙත්ථ න විජ්ජති;

වණිජ්ජා තාදිසී නත්ථි, හිරඤ්ඤෙන කයාකයං [කයක්කයං (සී. පී.)];

ඉතො දින්නෙන යාපෙන්ති, පෙතා කාලඞ්කතා තහි’’න්ති [ඛු. පා. 7.6; පෙ. ව. 19].

අත්ථෙව සුත්තන්තොති? ආමන්තා. තෙන හි ඉතො දින්නෙන තත්ථ යාපෙන්තීති.

491. න වත්තබ්බං – ‘‘ඉතො දින්නෙන තත්ථ යාපෙන්තී’’ති? ආමන්තා. නනු වුත්තං භගවතා – ‘‘පඤ්චිමානි, භික්ඛවෙ, ඨානානි සම්පස්සන්තා මාතාපිතරො පුත්තං ඉච්ඡන්ති කුලෙ ජායමානං! කතමානි පඤ්ච? භටො වා නො භරිස්සති, කිච්චං වා නො කරිස්සති, කුලවංසො චිරං ඨස්සති, දායජ්ජං පටිපජ්ජිස්සති, අථ වා පන පෙතානං කාලඞ්කතානං දක්ඛිණං අනුප්පදස්සති – ඉමානි ඛො, භික්ඛවෙ, පඤ්ච ඨානානි සම්පස්සන්තා මාතාපිතරො පුත්තං ඉච්ඡන්ති කුලෙ ජායමාන’’න්ති.

‘‘පඤ්ච ඨානානි සම්පස්සං, පුත්තං ඉච්ඡන්ති පණ්ඩිතා;

භටො වා නො භරිස්සති, කිච්චං වා නො කරිස්සති.

‘‘කුලවංසො චිරං තිට්ඨෙ, දායජ්ජං පටිපජ්ජති;

අථ වා පන පෙතානං, දක්ඛිණං අනුප්පදස්සති.

‘‘ඨානානෙතානි සම්පස්සං, පුත්තං ඉච්ඡන්ති පණ්ඩිතා;

තස්මා සන්තො සප්පුරිසා, කතඤ්ඤූ කතවෙදිනො.

‘‘භරන්ති මාතාපිතරො, පුබ්බෙ කතමනුස්සරං;

කරොන්ති තෙසං කිච්චානි, යථා තං පුබ්බකාරිනං.

‘‘ඔවාදකාරී භටපොසී, කුලවංසං අහාපයං;

සද්ධො සීලෙන සම්පන්නො, පුත්තො හොති පසංසියො’’ති [අ. නි. 5.31].

අත්ථෙව සුත්තන්තොති? ආමන්තා. තෙන හි ඉතො දින්නෙන තත්ථ යාපෙන්තීති.

ඉතො දින්නකථා නිට්ඨිතා.