7. සත්තමවග්ගො

(64) 2. සම්පයුත්තකථා

473. නත්ථි කෙචි ධම්මා කෙහිචි ධම්මෙහි සම්පයුත්තාති? ආමන්තා. නනු අත්ථි කෙචි ධම්මා කෙහිචි ධම්මෙහි සහගතා සහජාතා සංසට්ඨා එකුප්පාදා එකනිරොධා එකවත්ථුකා එකාරම්මණාති? ආමන්තා. හඤ්චි අත්ථි කෙචි ධම්මා කෙහිචි ධම්මෙහි සහගතා සහජාතා සංසට්ඨා එකුප්පාදා එකනිරොධා එකවත්ථුකා එකාරම්මණා, නො ච වත රෙ වත්තබ්බෙ – ‘‘නත්ථි කෙචි ධම්මා කෙහිචි ධම්මෙහි සම්පයුත්තා’’ති.

වෙදනාක්ඛන්ධො සඤ්ඤාක්ඛන්ධෙන සහජාතොති? ආමන්තා. හඤ්චි වෙදනාක්ඛන්ධො සඤ්ඤාක්ඛන්ධෙන සහජාතො, තෙන වත රෙ වත්තබ්බෙ – ‘‘වෙදනාක්ඛන්ධො සඤ්ඤාක්ඛන්ධෙන සම්පයුත්තො’’ති.

වෙදනාක්ඛන්ධො සඞ්ඛාරක්ඛන්ධෙන… විඤ්ඤාණක්ඛන්ධෙන සහජාතොති? ආමන්තා. හඤ්චි වෙදනාක්ඛන්ධො විඤ්ඤාණක්ඛන්ධෙන සහජාතො, තෙන වත රෙ වත්තබ්බෙ – ‘‘වෙදනාක්ඛන්ධො විඤ්ඤාණක්ඛන්ධෙන සම්පයුත්තො’’ති.

සඤ්ඤාක්ඛන්ධො … සඞ්ඛාරක්ඛන්ධො… විඤ්ඤාණක්ඛන්ධො වෙදනාඛන්ධෙන… සඤ්ඤාක්ඛන්ධෙන… සඞ්ඛාරක්ඛන්ධෙන සහජාතොති? ආමන්තා. හඤ්චි විඤ්ඤාණක්ඛන්ධො සඞ්ඛාරක්ඛන්ධෙන සහජාතො, තෙන වත රෙ වත්තබ්බෙ – ‘‘විඤ්ඤාණක්ඛන්ධො සඞ්ඛාරක්ඛන්ධෙන සම්පයුත්තො’’ති.

474. යථා තිලම්හි තෙලං අනුගතං අනුපවිට්ඨං, උච්ඡුම්හි රසො අනුගතො අනුපවිට්ඨො; එවමෙව තෙ ධම්මා තෙහි ධම්මෙහි අනුගතා අනුපවිට්ඨාති? න හෙවං වත්තබ්බෙ…පෙ….

සම්පයුත්තකථා නිට්ඨිතා.