6. ඡට්ඨවග්ගො

(60) 8. පථවීධාතු සනිදස්සනාතිආදිකථා

465. පථවීධාතු සනිදස්සනාති? ආමන්තා. රූපං රූපායතනං රූපධාතු නීලං පීතකං ලොහිතකං ඔදාතං චක්ඛුවිඤ්ඤෙය්‍යං චක්ඛුස්මිං පටිහඤ්ඤති චක්ඛුස්ස ආපාථං ආගච්ඡතීති? න හෙවං වත්තබ්බෙ…පෙ….

පථවීධාතු සනිදස්සනාති? ආමන්තා. චක්ඛුඤ්ච පටිච්ච පථවීධාතුඤ්ච උප්පජ්ජති චක්ඛුවිඤ්ඤාණන්ති? න හෙවං වත්තබ්බෙ…පෙ….

චක්ඛුඤ්ච පටිච්ච පථවීධාතුඤ්ච උප්පජ්ජති චක්ඛුවිඤ්ඤාණන්ති? ආමන්තා. ‘‘චක්ඛුඤ්ච පටිච්ච පථවීධාතුඤ්ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තොති? නත්ථි. ‘‘චක්ඛුඤ්ච පටිච්ච රූපෙ ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තොති? ආමන්තා. හඤ්චි ‘‘චක්ඛුඤ්ච පටිච්ච රූපෙ ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තො, නො ච වත රෙ වත්තබ්බෙ – ‘‘චක්ඛුඤ්ච පටිච්ච පථවීධාතුඤ්ච උප්පජ්ජති චක්ඛුවිඤ්ඤාණ’’න්ති.

466. න වත්තබ්බං – ‘‘පථවීධාතු සනිදස්සනා’’ති? ආමන්තා. නනු පස්සති භූමිං පාසාණං පබ්බතන්ති? ආමන්තා. හඤ්චි පස්සති [පස්සසි (සී. ස්‍යා. ක.) එවමුපරිපි] භූමිං පාසාණං පබ්බතං, තෙන වත රෙ වත්තබ්බෙ – ‘‘පථවීධාතු සනිදස්සනා’’ති…පෙ….

න වත්තබ්බං – ‘‘ආපොධාතු සනිදස්සනා’’ති? ආමන්තා. නනු පස්සති උදකන්ති? ආමන්තා. හඤ්චි පස්සති උදකං, තෙන වත රෙ වත්තබ්බෙ – ‘‘ආපොධාතු සනිදස්සනාති…පෙ….

න වත්තබ්බං – තෙජොධාතු සනිදස්සනාති? ආමන්තා. නනු පස්සති අග්ගිං ජලන්තන්ති? ආමන්තා. හඤ්චි පස්සති අග්ගිං ජලන්තං, තෙන වත රෙ වත්තබ්බෙ – ‘‘තෙජොධාතු සනිදස්සනා’’ති…පෙ….

න වත්තබ්බං – ‘‘වායොධාතු සනිදස්සනා’’ති? ආමන්තා. නනු පස්සති වාතෙන රුක්ඛෙ සඤ්චාලියමානෙති? ආමන්තා. හඤ්චි පස්සති වාතෙන රුක්ඛෙ සඤ්චාලියමානෙ, තෙන වත රෙ වත්තබ්බෙ – ‘‘වායොධාතු සනිදස්සනා’’ති…පෙ….

පථවීධාතු සනිදස්සනාතිආදිකථා නිට්ඨිතා.