6. ඡට්ඨවග්ගො

(61) 9. චක්ඛුන්ද්‍රියං සනිදස්සනන්තිආදිකථා

467. චක්ඛුන්ද්‍රියං සනිදස්සනන්ති? ආමන්තා. රූපං රූපායතනං රූපධාතු…පෙ… චක්ඛුස්ස ආපාථං ආගච්ඡතීති? න හෙවං වත්තබ්බෙ…පෙ….

චක්ඛුන්ද්‍රියං සනිදස්සනන්ති? ආමන්තා. චක්ඛුඤ්ච පටිච්ච චක්ඛුන්ද්‍රියඤ්ච උප්පජ්ජති චක්ඛුවිඤ්ඤාණන්ති? න හෙවං වත්තබ්බෙ…පෙ….

චක්ඛුඤ්ච පටිච්ච චක්ඛුන්ද්‍රියඤ්ච උප්පජ්ජති චක්ඛුවිඤ්ඤාණන්ති? ආමන්තා. ‘‘චක්ඛුඤ්ච පටිච්ච චක්ඛුන්ද්‍රියඤ්ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තොති? නත්ථි. ‘‘චක්ඛුඤ්ච පටිච්ච රූපෙ ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තොති? ආමන්තා. හඤ්චි ‘‘චක්ඛුඤ්ච පටිච්ච රූපෙ ච උප්පජ්ජති චක්ඛුවිඤ්ඤාණ’’න්ති – අත්ථෙව සුත්තන්තො, නො ච වත රෙ වත්තබ්බෙ – ‘‘චක්ඛුඤ්ච පටිච්ච චක්ඛුන්ද්‍රියඤ්ච උප්පජ්ජති චක්ඛුවිඤ්ඤාණ’’න්ති.

468. න වත්තබ්බං – ‘‘පඤ්චින්ද්‍රියානි සනිදස්සනානී’’ති? ආමන්තා. නනු පස්සති චක්ඛුං සොතං ඝානං ජිව්හං කායන්ති? ආමන්තා. හඤ්චි පස්සති චක්ඛුං සොතං ඝානං ජිව්හං කායං, තෙන වත රෙ වත්තබ්බෙ – ‘‘පඤ්චින්ද්‍රියානි සනිදස්සනානී’’ති…පෙ….

චක්ඛුන්ද්‍රියං සනිදස්සනන්තිආදිකථා නිට්ඨිතා.