(51) 9. පටුප්පන්නකථා

441. පටුප්පන්නෙ [පච්චුප්පන්නෙ (සී. ස්‍යා.)] ඤාණං අත්ථීති? ආමන්තා. තෙන ඤාණෙන තං ඤාණං ජානාතීති? න හෙවං වත්තබ්බෙ…පෙ… තෙන ඤාණෙන තං ඤාණං ජානාතීති? ආමන්තා. තෙන ඤාණෙන තං ඤාණං ‘‘ඤාණ’’න්ති ජානාතීති? න හෙවං වත්තබ්බෙ…පෙ… තෙන ඤාණෙන තං ඤාණං ‘‘ඤාණ’’න්ති ජානාතීති? ආමන්තා. තං ඤාණං තස්ස ඤාණස්ස ආරම්මණන්ති? න හෙවං වත්තබ්බෙ…පෙ….

තං ඤාණං තස්ස ඤාණස්ස ආරම්මණන්ති? ආමන්තා. තෙන ඵස්සෙන තං ඵස්සං ඵුසති, තාය වෙදනාය තං වෙදනං වෙදෙති, තාය සඤ්ඤාය තං සඤ්ඤං සඤ්ජානාති, තාය චෙතනාය තං චෙතනං චෙතෙති, තෙන චිත්තෙන තං චිත්තං චින්තෙති, තෙන විතක්කෙන තං විතක්කං විතක්කෙති, තෙන විචාරෙන තං විචාරං විචාරෙති, තාය පීතියා තං පීතිං පියායති, තාය සතියා තං සතිං සරති, තාය පඤ්ඤාය තං පඤ්ඤං පජානාති, තෙන ඛග්ගෙන තං ඛග්ගං ඡින්දති, තෙන ඵරසුනා තං ඵරසුං තච්ඡති, තාය කුධාරියා තං කුධාරිං තච්ඡති, තාය වාසියා තං වාසිං තච්ඡති, තාය සූචියා තං සූචිං සිබ්බෙති, තෙන අඞ්ගුලග්ගෙන තං අඞ්ගුලග්ගං පරාමසති, තෙන නාසිකග්ගෙන තං නාසිකග්ගං පරාමසති, තෙන මත්ථකෙන තං මත්ථකං පරාමසති, තෙන ගූථෙන තං ගූථං ධොවති, තෙන මුත්තෙන තං මුත්තං ධොවති, තෙන ඛෙළෙන තං ඛෙළං ධොවති, තෙන පුබ්බෙන තං පුබ්බං ධොවති, තෙන ලොහිතෙන තං ලොහිතං ධොවතීති? න හෙවං වත්තබ්බෙ …පෙ….

442. න වත්තබ්බං – ‘‘පටුප්පන්නෙ ඤාණං අත්ථී’’ති? ආමන්තා. නනු සබ්බසඞ්ඛාරෙ අනිච්චතො දිට්ඨෙ තම්පි ඤාණං අනිච්චතො දිට්ඨං හොතීති? ආමන්තා. හඤ්චි සබ්බසඞ්ඛාරෙ අනිච්චතො දිට්ඨෙ තම්පි ඤාණං අනිච්චතො දිට්ඨං හොති, තෙන වත රෙ වත්තබ්බෙ – ‘‘පටුප්පන්නෙ ඤාණං අත්ථී’’ති.

පටුප්පන්නඤාණකථා [පච්චුප්පන්නකථා (සී.)] නිට්ඨිතා.