5. පඤ්චමවග්ගො

(52) 10. ඵලඤාණකථා

443. සාවකස්ස ඵලෙ ඤාණං අත්ථීති? ආමන්තා. සාවකො ඵලස්ස කතං පඤ්ඤාපෙතීති? න හෙවං වත්තබ්බ…පෙ….

සාවකස්ස ඵලෙ ඤාණං අත්ථීති? ආමන්තා. අත්ථි සාවකස්ස ඵලපරොපරියත්ති ඉන්ද්‍රියපරොපරියත්ති පුග්ගලපරොපරියත්තීති? න හෙවං වත්තබ්බෙ…පෙ….

සාවකස්ස ඵලෙ ඤාණං අත්ථීති? ආමන්තා. අත්ථි සාවකස්ස ඛන්ධපඤ්ඤත්ති ආයතනපඤ්ඤත්ති ධාතුපඤ්ඤත්ති සච්චපඤ්ඤත්ති ඉන්ද්‍රියපඤ්ඤත්ති පුග්ගලපඤ්ඤත්තීති? න හෙවං වත්තබ්බෙ…පෙ….

සාවකස්ස ඵලෙ ඤාණං අත්ථීති? ආමන්තා. සාවකො ජිනො සත්ථා සම්මාසම්බුද්ධො සබ්බඤ්ඤූ සබ්බදස්සාවී ධම්මස්සාමී ධම්මප්පටිසරණොති? න හෙවං වත්තබ්බෙ…පෙ….

සාවකස්ස ඵලෙ ඤාණං අත්ථීති? ආමන්තා. සාවකො අනුප්පන්නස්ස මග්ගස්ස උප්පාදෙතා අසඤ්ජාතස්ස මග්ගස්ස සඤ්ජනෙතා අනක්ඛාතස්ස මග්ගස්ස අක්ඛාතා මග්ගඤ්ඤූ මග්ගවිදූ මග්ගකොවිදොති? න හෙවං වත්තබ්බෙ…පෙ….

444. න වත්තබ්බං – ‘‘සාවකස්ස ඵලෙ ඤාණං අත්ථී’’ති? ආමන්තා. සාවකො අඤ්ඤාණීති? න හෙවං වත්තබ්බෙ…පෙ… තෙන හි සාවකස්ස ඵලෙ ඤාණං අත්ථීති…පෙ….

ඵලඤාණකථා නිට්ඨිතා.

පඤ්චමවග්ගො.

තස්සුද්දානං –

විමුත්තිඤාණං විමුත්තං, සෙඛස්ස අසෙඛං ඤාණං, විපරීතෙ ඤාණං, අනියතස්ස නියාමගමනාය අත්ථි ඤාණං, සබ්බං ඤාණං පටිසම්භිදාති, සම්මුතිඤාණං, චෙතොපරියායෙ ඤාණං, අනාගතෙ ඤාණං, පටුප්පන්නෙ ඤාණං, සාවකස්ස ඵලෙ ඤාණන්ති.

මහාපණ්ණාසකො.

තස්සාපි උද්දානං –

සත්තුපලද්ධිං, උපහරතො, බලං, ගිහිස්ස අරහා ච, විමුත්තිපඤ්චමන්ති.