(49) 7. චිත්තාරම්මණකථා

436. චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණන්ති? ආමන්තා. නනු අත්ථි කොචි ‘‘සරාගං චිත්තං සරාගං චිත්ත’’න්ති පජානාතීති? ආමන්තා. හඤ්චි අත්ථි කොචි ‘‘සරාගං චිත්තං සරාගං චිත්ත’’න්ති පජානාති, නො ච වත රෙ වත්තබ්බෙ – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති.

නනු අත්ථි කොචි වීතරාගං චිත්තං…පෙ… සදොසං චිත්තං… වීතදොසං චිත්තං… සමොහං චිත්තං… වීතමොහං චිත්තං… සංඛිත්තං චිත්තං… වික්ඛිත්තං චිත්තං… මහග්ගතං චිත්තං… අමහග්ගතං චිත්තං… සඋත්තරං චිත්තං… අනුත්තරං චිත්තං… සමාහිතං චිත්තං… අසමාහිතං චිත්තං… විමුත්තං චිත්තං…පෙ… අවිමුත්තං චිත්තං ‘‘අවිමුත්තං චිත්ත’’න්ති පජානාතීති? ආමන්තා. හඤ්චි අත්ථි කොචි ‘‘අවිමුත්තං චිත්තං අවිමුත්තං චිත්ත’’න්ති පජානාති, නො ච වත රෙ වත්තබ්බෙ – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති.

437. ඵස්සාරම්මණෙ ඤාණං වත්තබ්බං – ‘‘චෙතොපරියායෙ ඤාණ’’න්ති? ආමන්තා. හඤ්චි ඵස්සාරම්මණෙ ඤාණං වත්තබ්බං චෙතොපරියායෙ ඤාණං, නො ච වත රෙ වත්තබ්බෙ – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති. වෙදනාරම්මණෙ ඤාණං…පෙ… සඤ්ඤාරම්මණෙ ඤාණං… චෙතනාරම්මණෙ ඤාණං… චිත්තාරම්මණෙ ඤාණං… සද්ධාරම්මණෙ ඤාණං… වීරියාරම්මණෙ ඤාණං… සතාරම්මණෙ ඤාණං… සමාධාරම්මණෙ ඤාණං… පඤ්ඤාරම්මණෙ ඤාණං… රාගාරම්මණෙ ඤාණං … දොසාරම්මණෙ ඤාණං… මොහාරම්මණෙ ඤාණං…පෙ… අනොත්තප්පාරම්මණෙ ඤාණං වත්තබ්බං – ‘‘චෙතොපරියායෙ ඤාණ’’න්ති? ආමන්තා. හඤ්චි අනොත්තප්පාරම්මණෙ ඤාණං වත්තබ්බං චෙතොපරියායෙ ඤාණං, නො ච වත රෙ වත්තබ්බෙ – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති.

ඵස්සාරම්මණෙ ඤාණං න වත්තබ්බං – ‘‘චෙතොපරියායෙ ඤාණ’’න්ති? ආමන්තා. ඵස්සපරියායෙ ඤාණන්ති? න හෙවං වත්තබ්බෙ…පෙ… වෙදනාරම්මණෙ ඤාණං…පෙ… සඤ්ඤාරම්මණෙ ඤාණං…පෙ… අනොත්තප්පාරම්මණෙ ඤාණං න වත්තබ්බං – ‘‘චෙතොපරියායෙ ඤාණ’’න්ති? ආමන්තා. අනොත්තප්පපරියායෙ ඤාණන්ති? න හෙවං වත්තබ්බෙ…පෙ….

438. න වත්තබ්බං – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති? ආමන්තා. නනු චෙතොපරියායෙ ඤාණන්ති? ආමන්තා. හඤ්චි චෙතොපරියායෙ ඤාණං, තෙන වත රෙ වත්තබ්බෙ – ‘‘චෙතොපරියායෙ ඤාණං චිත්තාරම්මණඤ්ඤෙව න අඤ්ඤාරම්මණ’’න්ති.

චිත්තාරම්මණකථා නිට්ඨිතා.