5. පඤ්චමවග්ගො

(50) 8. අනාගතඤාණකථා

439. අනාගතෙ ඤාණං අත්ථීති? ආමන්තා. අනාගතං මූලතො ජානාති, හෙතුතො ජානාති, නිදානතො ජානාති, සම්භවතො ජානාති, පභවතො ජානාති, සමුට්ඨානතො ජානාති, ආහාරතො ජානාති, ආරම්මණතො ජානාති, පච්චයතො ජානාති, සමුදයතො ජානාතීති? න හෙවං වත්තබ්බෙ…පෙ….

අනාගතෙ ඤාණං අත්ථීති? ආමන්තා. අනාගතං හෙතුපච්චයතං ජානාති, ආරම්මණපච්චයතං ජානාති, අධිපතිපච්චයතං ජානාති, අනන්තරපච්චයතං ජානාති, සමනන්තරපච්චයතං ජානාතීති? න හෙවං වත්තබ්බෙ…පෙ….

අනාගතෙ ඤාණං අත්ථීති? ආමන්තා. ගොත්‍රභුනො පුග්ගලස්ස සොතාපත්තිමග්ගෙ ඤාණං අත්ථීති? න හෙවං වත්තබ්බෙ…පෙ…. සොතාපත්තිඵලසච්ඡිකිරියාය පටිපන්නස්ස පුග්ගලස්ස සොතාපත්තිඵලෙ ඤාණං අත්ථීති? න හෙවං වත්තබ්බෙ…පෙ….

සකදාගාමි…පෙ… අනාගාමි …පෙ… අරහත්තසච්ඡිකිරියාය පටිපන්නස්ස පුග්ගලස්ස අරහත්තෙ ඤාණං අත්ථීති? න හෙවං වත්තබ්බෙ…පෙ….

440. න වත්තබ්බං – ‘‘අනාගතෙ ඤාණං අත්ථී’’ති? ආමන්තා. නනු වුත්තං භගවතා – ‘‘පාටලිපුත්තස්ස ඛො, ආනන්ද, තයො අන්තරායා භවිස්සන්ති – අග්ගිතො වා උදකතො වා මිථුභෙදා වා’’ති [මහාව. 286; දී. නි. 2.152; උදා. 76]! අත්ථෙව සුත්තන්තොති? ආමන්තා. තෙන හි අනාගතෙ ඤාණං අත්ථීති.

අනාගතඤාණකථා නිට්ඨිතා.