(47) 5. පටිසම්භිදාකථා

432. සබ්බං ඤාණං පටිසම්භිදාති? ආමන්තා. සම්මුතිඤාණං පටිසම්භිදාති? න හෙවං වත්තබ්බෙ…පෙ… සම්මුතිඤාණං පටිසම්භිදාති? ආමන්තා. යෙ කෙචි සම්මුතිං ජානන්ති, සබ්බෙ තෙ පටිසම්භිදාපත්තාති? න හෙවං වත්තබ්බෙ…පෙ… සබ්බං ඤාණං පටිසම්භිදාති? ආමන්තා. චෙතොපරියායෙ ඤාණං පටිසම්භිදාති? න හෙවං වත්තබ්බෙ…පෙ… චෙතොපරියායෙ ඤාණං පටිසම්භිදාති? ආමන්තා. යෙ කෙචි පරචිත්තං ජානන්ති, සබ්බෙ තෙ පටිසම්භිදාපත්තාති? න හෙවං වත්තබ්බෙ…පෙ….

සබ්බං ඤාණං පටිසම්භිදාති? ආමන්තා. සබ්බා පඤ්ඤා පටිසම්භිදාති? න හෙවං වත්තබ්බෙ…පෙ… සබ්බා පඤ්ඤා පටිසම්භිදාති? ආමන්තා. පථවීකසිණං සමාපත්තිං සමාපන්නස්ස අත්ථි පඤ්ඤා, සා පඤ්ඤා පටිසම්භිදාති? න හෙවං වත්තබ්බෙ…පෙ… ආපොකසිණං…පෙ… තෙජොකසිණං…පෙ… වායොකසිණං…පෙ… නීලකසිණං…පෙ… පීතකසිණං…පෙ… ලොහිතකසිණං…පෙ… ඔදාතකසිණං…පෙ… ආකාසානඤ්චායතනං…පෙ… විඤ්ඤාණඤ්චායතනං…පෙ… ආකිඤ්චඤ්ඤායතනං…පෙ… නෙවසඤ්ඤානාසඤ්ඤායතනං සමාපන්නස්ස…පෙ… දානං දදන්තස්ස…පෙ… චීවරං දදන්තස්ස…පෙ… පිණ්ඩපාතං දදන්තස්ස…පෙ… සෙනාසනං දදන්තස්ස…පෙ… ගිලානපච්චයභෙසජ්ජපරික්ඛාරං දදන්තස්ස අත්ථි පඤ්ඤා, සා පඤ්ඤා පටිසම්භිදාති? න හෙවං වත්තබ්බෙ…පෙ….

433. න වත්තබ්බං – ‘‘සබ්බං ඤාණං පටිසම්භිදා’’ති? ආමන්තා. අත්ථි ලොකුත්තරා පඤ්ඤා, සා පඤ්ඤා න පටිසම්භිදාති? න හෙවං වත්තබ්බෙ…පෙ… තෙන හි සබ්බං ඤාණං පටිසම්භිදාති.

පටිසම්භිදාකථා නිට්ඨිතා.