5. පඤ්චමවග්ගො

(48) 6. සම්මුතිඤාණකථා

434. න වත්තබ්බං – ‘‘සම්මුතිඤාණං සච්චාරම්මණඤ්ඤෙව න අඤ්ඤාරම්මණ’’න්ති? ආමන්තා. නනු පථවීකසිණං සමාපත්තිං සමාපන්නස්ස අත්ථි ඤාණං, පථවීකසිණඤ්ච සම්මුතිසච්චම්හීති? ආමන්තා. හඤ්චි පථවීකසිණං සමාපත්තිං සමාපන්නස්ස අත්ථි ඤාණං, පථවීකසිණඤ්ච සම්මුතිසච්චම්හි, තෙන වත රෙ වත්තබ්බෙ – ‘‘සම්මුතිඤාණං සච්චාරම්මණඤ්ඤෙව න අඤ්ඤාරම්මණ’’න්ති.

න වත්තබ්බං – ‘‘සම්මුතිඤාණං සච්චාරම්මණඤ්ඤෙව න අඤ්ඤාරම්මණ’’න්ති? ආමන්තා…පෙ… නනු ආපොකසිණං…පෙ… තෙජොකසිණං…පෙ… ගිලානපච්චයභෙසජ්ජපරික්ඛාරං දදන්තස්ස අත්ථි ඤාණං, ගිලානපච්චයභෙසජ්ජපරික්ඛාරො ච සම්මුතිසච්චම්හීති? ආමන්තා. හඤ්චි ගිලානපච්චයභෙසජ්ජපරික්ඛාරං දදන්තස්ස අත්ථි ඤාණං, ගිලානපච්චයභෙසජ්ජපරික්ඛාරො ච සම්මුතිසච්චම්හි, තෙන වත රෙ වත්තබ්බෙ – ‘‘සම්මුතිඤාණං සච්චාරම්මණඤ්ඤෙව න අඤ්ඤාරම්මණ’’න්ති.

435. සම්මුතිඤාණං සච්චාරම්මණඤ්ඤෙව න අඤ්ඤාරම්මණන්ති? ආමන්තා. තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….

සම්මුතිඤාණකථා නිට්ඨිතා.