(44) 2. අසෙඛඤාණකථා

421. සෙඛස්ස අසෙඛං ඤාණං අත්ථීති? ආමන්තා. සෙඛො අසෙඛං ධම්මං ජානාති පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතීති? න හෙවං වත්තබ්බෙ…පෙ… නනු සෙඛො අසෙඛං ධම්මං න ජානාති න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතීති? ආමන්තා. හඤ්චි සෙඛො අසෙඛං ධම්මං න ජානාති න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරති, නො ච වත රෙ වත්තබ්බෙ – ‘‘සෙඛස්ස අසෙඛං ඤාණං අත්ථී’’ති.

අසෙඛස්ස අසෙඛං ඤාණං අත්ථි, අසෙඛො අසෙඛං ධම්මං ජානාති පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතීති? ආමන්තා. සෙඛස්ස අසෙඛං ඤාණං අත්ථි, සෙඛො අසෙඛං ධම්මං ජානාති පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතීති? න හෙවං වත්තබ්බෙ…පෙ….

422. සෙඛස්ස අසෙඛං ඤාණං අත්ථි, සෙඛො අසෙඛං ධම්මං න ජානාති න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතීති? ආමන්තා. අසෙඛස්ස අසෙඛං ඤාණං අත්ථි, අසෙඛො අසෙඛං ධම්මං න ජානාති න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතීති? න හෙවං වත්තබ්බෙ…පෙ….

සෙඛස්ස අසෙඛං ඤාණං අත්ථීති? ආමන්තා. ගොත්‍රභුනො පුග්ගලස්ස සොතාපත්තිමග්ගෙ ඤාණං අත්ථීති? න හෙවං වත්තබ්බෙ…පෙ… සොතාපත්තිඵලසච්ඡිකිරියාය පටිපන්නස්ස පුග්ගලස්ස සොතාපත්තිඵලෙ ඤාණං අත්ථීති? න හෙවං වත්තබ්බෙ…පෙ… සකදාගාමිඵල… අනාගාමිඵල… අරහත්තසච්ඡිකිරියාය පටිපන්නස්ස පුග්ගලස්ස අරහත්තෙ ඤාණං අත්ථීති? න හෙවං වත්තබ්බෙ…පෙ….

423. න වත්තබ්බං – ‘‘සෙඛස්ස අසෙඛං ඤාණං අත්ථී’’ති? ආමන්තා. නනු ආයස්මා ආනන්දො සෙඛො – ‘‘භගවා උළාරො’’ති ජානාති, ‘‘සාරිපුත්තො ථෙරො, මහාමොග්ගල්ලානො ථෙරො උළාරො’’ති ජානාතීති? ආමන්තා. හඤ්චි ආයස්මා ආනන්දො සෙඛො – ‘‘භගවා උළාරො’’ති ජානාති, ‘‘සාරිපුත්තො ථෙරො, මහාමොග්ගල්ලානො ථෙරො උළාරො’’ති ජානාති, තෙන වත රෙ වත්තබ්බෙ – ‘‘සෙඛස්ස අසෙඛං ඤාණං අත්ථී’’ති.

අසෙඛඤාණකථා නිට්ඨිතා.