5. පඤ්චමවග්ගො

(45) 3. විපරීතකථා

424. පථවීකසිණං සමාපත්තිං [පථවීකසිණසමාපත්තිං (සී. ක.)] සමාපන්නස්ස විපරීතෙ ඤාණන්ති? ආමන්තා. අනිච්චෙ නිච්චන්ති විපරියෙසොති? න හෙවං වත්තබ්බෙ…පෙ… දුක්ඛෙ සුඛන්ති…පෙ… අනත්තනි අත්තාති…පෙ… අසුභෙ සුභන්ති විපරියෙසොති? න හෙවං වත්තබ්බෙ…පෙ….

පථවීකසිණං සමාපත්තිං සමාපන්නස්ස විපරීතෙ ඤාණන්ති? ආමන්තා. අකුසලන්ති? න හෙවං වත්තබ්බෙ…පෙ… නනු කුසලන්ති? ආමන්තා. හඤ්චි කුසලං, නො ච වත රෙ වත්තබ්බෙ – ‘‘පථවීකසිණං සමාපත්තිං සමාපන්නස්ස විපරීතෙ ඤාණ’’න්ති.

අනිච්චෙ නිච්චන්ති විපරියෙසො, සො ච අකුසලොති? ආමන්තා. පථවීකසිණං සමාපත්තිං සමාපන්නස්ස විපරීතෙ ඤාණං, තඤ්ච අකුසලන්ති? න හෙවං වත්තබ්බෙ…පෙ… දුක්ඛෙ සුඛන්ති…පෙ… අනත්තනි අත්තාති…පෙ… අසුභෙ සුභන්ති විපරියෙසො, සො ච අකුසලොති? ආමන්තා. පථවීකසිණං සමාපත්තිං සමාපන්නස්ස විපරීතෙ ඤාණං, තඤ්ච අකුසලන්ති? න හෙවං වත්තබ්බෙ…පෙ….

425. පථවීකසිණං සමාපත්තිං සමාපන්නස්ස විපරීතෙ ඤාණං, තඤ්ච අකුසලන්ති? ආමන්තා. අනිච්චෙ නිච්චන්ති විපරියෙසො, සො ච කුසලොති? න හෙවං වත්තබ්බෙ…පෙ… පථවීකසිණං සමාපත්තිං සමාපන්නස්ස විපරීතෙ ඤාණං, තඤ්ච අකුසලන්ති? ආමන්තා. දුක්ඛෙ සුඛන්ති…පෙ… අනත්තනි අත්තාති…පෙ… අසුභෙ සුභන්ති විපරියෙසො, සො ච කුසලොති? න හෙවං වත්තබ්බෙ…පෙ….

426. පථවීකසිණං සමාපත්තිං සමාපන්නස්ස විපරීතෙ ඤාණන්ති? ආමන්තා. අරහා පථවීකසිණං සමාපත්තිං සමාපජ්ජෙය්‍යාති? ආමන්තා. හඤ්චි අරහා පථවීකසිණං සමාපත්තිං සමාපජ්ජෙය්‍ය, නො ච වත රෙ වත්තබ්බෙ – ‘‘පථවීකසිණං සමාපත්තිං සමාපන්නස්ස විපරීතෙ ඤාණ’’න්ති.

පථවීකසිණං සමාපත්තිං සමාපන්නස්ස විපරීතෙ ඤාණං, අරහා පථවීකසිණං සමාපත්තිං සමාපජ්ජෙය්‍යාති? ආමන්තා. අත්ථි අරහතො විපරියෙසොති? න හෙවං වත්තබ්බෙ…පෙ….

අත්ථි අරහතො විපරියෙසොති? ආමන්තා. අත්ථි අරහතො සඤ්ඤාවිපරියෙසො චිත්තවිපරියෙසො දිට්ඨිවිපරියෙසොති? න හෙවං වත්තබ්බෙ…පෙ….

නත්ථි අරහතො සඤ්ඤාවිපරියෙසො චිත්තවිපරියෙසො දිට්ඨිවිපරියෙසොති? ආමන්තා. හඤ්චි නත්ථි අරහතො සඤ්ඤාවිපරියෙසො චිත්තවිපරියෙසො දිට්ඨිවිපරියෙසො, නො ච වත රෙ වත්තබ්බෙ – ‘‘අත්ථි අරහතො විපරියෙසො’’ති.

427. න වත්තබ්බං – පථවීකසිණං සමාපත්තිං සමාපන්නස්ස විපරීතෙ ඤාණන්ති? ආමන්තා. පථවීකසිණං සමාපත්තිං සමාපජ්ජන්තස්ස සබ්බෙව පථවීති? න හෙවං වත්තබ්බෙ. තෙන හි පථවීකසිණං සමාපත්තිං සමාපන්නස්ස විපරීතෙ ඤාණන්ති.

පථවීකසිණං සමාපත්තිං සමාපන්නස්ස විපරීතෙ ඤාණන්ති? ආමන්තා. නනු පථවී අත්ථි, අත්ථි ච කොචි පථවිං පථවිතො සමාපජ්ජතීති? ආමන්තා. හඤ්චි පථවී අත්ථි, අත්ථි ච කොචි පථවිං පථවිතො සමාපජ්ජති, නො ච වත රෙ වත්තබ්බෙ – ‘‘පථවීකසිණං සමාපත්තිං සමාපන්නස්ස විපරීතෙ ඤාණ’’න්ති.

පථවී අත්ථි, පථවිං පථවිතො සමාපජ්ජන්තස්ස විපරීතං හොතීති? ආමන්තා. නිබ්බානං අත්ථි, නිබ්බානං නිබ්බානතො සමාපජ්ජන්තස්ස විපරීතං හොතීති? න හෙවං වත්තබ්බෙ…පෙ… තෙන හි න වත්තබ්බං – ‘‘පථවීකසිණං සමාපත්තිං සමාපන්නස්ස විපරීතෙ ඤාණ’’න්ති.

විපරීතකථා නිට්ඨිතා.