(15) 6. දුක්ඛාහාරකථා

334. දුක්ඛාහාරො මග්ගඞ්ගං මග්ගපරියාපන්නන්ති? ආමන්තා. යෙ කෙචි දුක්ඛන්ති වාචං භාසන්ති, සබ්බෙ තෙ මග්ගං භාවෙන්තීති? න හෙවං වත්තබ්බෙ.

යෙ කෙචි දුක්ඛන්ති වාචං භාසන්ති, සබ්බෙ තෙ මග්ගං භාවෙන්තීති? ආමන්තා. බාලපුථුජ්ජනා දුක්ඛන්ති වාචං භාසන්ති, බාලපුථුජ්ජනා මග්ගං භාවෙන්තීති? න හෙවං වත්තබ්බෙ. මාතුඝාතකො… පිතුඝාතකො… අරහන්තඝාතකො… රුහිරුප්පාදකො [ලොහිතුප්පාදකො (සී. ක.) අඤ්ඤට්ඨානෙසු පන රුහිරුප්පාදකොත්වෙව දිස්සති] … සඞ්ඝභෙදකො දුක්ඛන්ති වාචං භාසති, සඞ්ඝභෙදකො මග්ගං භාවෙතීති? න හෙවං වත්තබ්බෙ…පෙ….

දුක්ඛාහාරකථා නිට්ඨිතා.