2. දුතියවග්ගො

(20) 11. නිරොධකථා

353. ද්වෙ නිරොධාති? ආමන්තා. ද්වෙ දුක්ඛනිරොධාති? න හෙවං වත්තබ්බෙ…පෙ… ද්වෙ දුක්ඛනිරොධාති? ආමන්තා. ද්වෙ නිරොධසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ දුක්ඛසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ සමුදයසච්චානීති? න හෙවං වත්තබ්බෙ…පෙ… ද්වෙ නිරොධසච්චානීති? ආමන්තා. ද්වෙ මග්ගසච්චානීති? න හෙවං වත්තබ්බෙ…පෙ….

ද්වෙ නිරොධසච්චානීති? ආමන්තා. ද්වෙ තාණානි…පෙ… ද්වෙ ලෙණානි… ද්වෙ සරණානි… ද්වෙ පරායණානි… ද්වෙ අච්චුතානි… ද්වෙ අමතානි… ද්වෙ නිබ්බානානීති? න හෙවං වත්තබ්බෙ…පෙ….

ද්වෙ නිබ්බානානීති? ආමන්තා. අත්ථි ද්වින්නං නිබ්බානානං උච්චනීචතා හීනපණීතතා උක්කංසාවකංසො සීමා වා භෙදො වා රාජි වා අන්තරිකා වාති? න හෙවං වත්තබ්බෙ…පෙ….

ද්වෙ නිරොධාති? ආමන්තා. නනු අප්පටිසඞ්ඛානිරුද්ධෙ සඞ්ඛාරෙ පටිසඞ්ඛා නිරොධෙන්තීති? ආමන්තා. හඤ්චි අප්පටිසඞ්ඛානිරුද්ධෙ සඞ්ඛාරෙ පටිසඞ්ඛා නිරොධෙන්ති, නො ච වත රෙ වත්තබ්බෙ – ‘‘ද්වෙ නිරොධා’’ති.

න වත්තබ්බං – ‘‘ද්වෙ නිරොධා’’ති? ආමන්තා. නනු අප්පටිසඞ්ඛානිරුද්ධාපි සඞ්ඛාරා අච්චන්තභග්ගා, පටිසඞ්ඛානිරුද්ධාපි සඞ්ඛාරා අච්චන්තභග්ගාති? ආමන්තා. හඤ්චි අප්පටිසඞ්ඛානිරුද්ධාපි සඞ්ඛාරා අච්චන්තභග්ගා, පටිසඞ්ඛානිරුද්ධාපි සඞ්ඛාරා අච්චන්තභග්ගා, තෙන වත රෙ වත්තබ්බෙ – ‘‘ද්වෙ නිරොධා’’ති.

ද්වෙ නිරොධාති? ආමන්තා. පටිසඞ්ඛානිරුද්ධාපි [පටිසඞ්ඛානිරුද්ධා (?)] සඞ්ඛාරා අරියමග්ගං ආගම්ම නිරුද්ධාති? ආමන්තා. අප්පටිසඞ්ඛානිරුද්ධා සඞ්ඛාරා අරියමග්ගං ආගම්ම නිරුද්ධාති? න හෙවං වත්තබ්බෙ…පෙ….

ද්වෙ නිරොධාති? ආමන්තා. පටිසඞ්ඛානිරුද්ධා සඞ්ඛාරා න පුන උප්පජ්ජන්තීති? ආමන්තා. අප්පටිසඞ්ඛානිරුද්ධා සඞ්ඛාරා න පුන උප්පජ්ජන්තීති? න හෙවං වත්තබ්බෙ…පෙ… තෙන හි න වත්තබ්බං – ‘‘ද්වෙ නිරොධා’’ති.

නිරොධකථා නිට්ඨිතා.

දුතියවග්ගො.

තස්සුද්දානං –

පරූපහාරො අඤ්ඤාණං, කඞ්ඛා පරවිතාරණා;

වචීභෙදො දුක්ඛාහාරො, චිත්තට්ඨිති ච කුක්කුළා;

අනුපුබ්බාභිසමයො, වොහාරො ච නිරොධකොති.