ඉන්ද්‍රියතික්ඛකාරණනවකකථා
699. යස්ස පන එවං නයවිපස්සනාය යොගං කරොතොපි නයවිපස්සනා න සම්පජ්ජති, තෙන ‘‘නවහාකාරෙහි ඉන්ද්‍රියානි තික්ඛානි භවන්ති – උප්පන්නුප්පන්නානං සඞ්ඛාරානං ඛයමෙව පස්සති, තත්ථ ච සක්කච්චකිරියාය සම්පාදෙති, සාතච්චකිරියාය සම්පාදෙති, සප්පායකිරියාය සම්පාදෙති, සමාධිස්ස ච නිමිත්තග්ගාහෙන, බොජ්ඣඞ්ගානඤ්ච අනුපවත්තනතාය, කායෙ ච ජීවිතෙ ච අනපෙක්ඛතං උපට්ඨාපෙති, තත්ථ ච අභිභුය්‍ය නෙක්ඛම්මෙන, අන්තරා ච අබ්‍යොසානෙනා’’ති එවං වුත්තානං නවන්නං ආකාරානං වසෙන ඉන්ද්‍රියානි තික්ඛානි කත්වා පථවීකසිණනිද්දෙසෙ වුත්තනයෙන සත්ත අසප්පායානි වජ්ජෙත්වා සත්ත සප්පායානි සෙවමානෙන කාලෙන රූපං සම්මසිතබ්බං, කාලෙන අරූපං. රූපං සම්මසන්තෙන රූපස්ස නිබ්බත්ති පස්සිතබ්බා.