33. කපණාය වත්ථුම්හි අයමානුපුබ්බීකථා

භගවති පරිනිබ්බුතෙ ජම්බුදීපෙ තත්ථ තත්ථ භික්ඛුභික්ඛුණියො ච උපාසකඋපාසිකායො ච ජයමහාබොධිං වන්දිස්සාමීති යෙභුය්‍යෙන ගන්ත්වා වන්දන්ති. අථා පරභාගෙ බහූ භික්ඛූ සඞ්ගම්ම මහාබොධිං වන්දනත්ථාය ගච්ඡන්තා අඤ්ඤතරස්මිං ගාමකෙ භික්ඛාය චරිත්වා ආසනසාලං ගන්ත්වා කතභත්තකිච්චා ථොකං විස්සමිංසු, තදා තත්ථ එකා කපණා දුග්ගතිත්ථී තථා නිසින්නභික්ඛූ දිස්වා උපසඞ්කමිත්වා පඤ්චපතිට්ඨිතෙන වන්දිත්වා එකමන්තෙ ඨිතා අය්‍යා කුහිං ගච්ඡන්තීති පුච්ඡි. භික්ඛූ තං සුත්වා ජයමහාබොධිස්ස ආනුභාවඤ්ච තං වන්දනත්ථාය අත්තානං ගමනඤ්ච කථෙන්තා එවමාහංසු.

1. යත්ථාසීනො ජිනො ජෙසි, සසෙනං මකරද්ධජං;

හන්ත්වා කිලෙසසෙනඤ්ච, බුද්ධො ආසි නිරුත්තරො.

2. යං පූජෙසි මහාවීරො, ඨිතො පද මකොපයං;

සත්තරත්තින්දිවං නෙත්ත, නීලනීරජරංසිනා.

3. සුරාසුරනරාදීනං, නෙත්තාලි පාළිපාතනා;

මෙචකාකාරපත්තෙහි, සිඛණ්ඩීවිය භාති යො.

4. සුරපාදපොව සත්තානං, යං තිට්ඨති මහීතලෙ;

ඉහ ලොකෙ පරත්තෙ ච, දදන්තො ඉච්ඡිතිච්ඡිතං.

5. යස්ස පුරාණපණ්ණම්පි, පතිතං යො නරො ඉධ;

පූජෙති තස්ස සො දෙති, භවභොගං මහීරුහො.

6. ගන්ධමාලෙහි සලිලෙහි, යමුපාසති සදා නරො;

අජ්ඣත්තඤ්ච බහිද්ධා ච, දුරිතං සො නිහඤ්ඤති.

7. යො දෙති ඉහලොකත්ථං,

යො දෙති පාරලොකිකං,

සම්පදං ජයබොධිංතං,

භොති ගච්ඡාම වන්දිතුං.

තං සුත්වා උදග්ගා සොමනස්සජාතා භික්ඛූනං එවමාහ. අහං භන්තෙ පරකුලෙ භතියා කම්මං කරොන්තී දුක්ඛෙන කසිරෙන ජීවිකං කප්පෙමි. ස්වාතනාය මෙ තණ්ඩුලනාලිපි [භණ්ඩුලනාම්ප ඉතිසබ්බත්ථ] නත්ථි, පගෙව අඤ්ඤං ධනං, ඉමං විනා අඤ්ඤං සාටකම්පි නත්ථි, කස්මා පුබ්බෙ අකතපුඤ්ඤත්තා, තස්මා ඉමං භන්තෙ සාටකං මමානුග්ගහාය බොධිම්හි ධජං බන්ධථාති යාචිත්වා සාටකං ධොවිත්වා තෙසං අදාසි. භික්ඛූපි තස්සානුග්ගහාය තං ගහෙත්වා අගමංසු. සා සාටකං දත්වා පීතිපාමොජ්ජමානසා ගෙහං ගන්ත්වා තදහෙව රත්තියා මජ්ඣිමයාමෙ සත්ථකවාතෙන උපහතා කාලං කත්වා තෙසං භික්ඛූනං ගමනමග්ගෙ එකස්මිං රමණීයෙ වනසණ්ඩෙ භුම්මදෙවතා හුත්වා නිබ්බත්තී, අථස්සා පුඤ්ඤානුභාවෙන තියොජනිකෙ ඨානෙ දිබ්බකප්පරුක්ඛා පාතුරහංසු, තත්ත තත්ත නානාවිරාගධජපතාකා ඔලම්බන්ති. දෙවපුත්තා ච දෙවධීතරො ච සබ්බාභරණවිභූසිතා තථෙව ධජපතාකාදයො ගහෙත්වා කීළන්ති. නච්චගීතාදිනෙකානි අච්ඡරියානි පයොජෙන්ති. අථ දුතියදිවසෙ තෙපි භික්ඛූ බොධිමණ්ඩලං ගච්ඡන්තා සායණ්හෙ තං ඨානං පත්වා අජ්ජ ඉමස්මිං වනසණ්ඩෙ වසිත්වා ගමිස්සාමාති තත්ථ වාසං උපගමිංසු, තතො තෙ රත්තිභාගෙ නානාවණ්ණධජෙ ච දෙවතාහි පයොජියමානා ගීතවාදිතාදයො ච තියොජනට්ඨානෙ කප්පරුක්ඛානි ච ඉදං සබ්බං දෙවිස්සරියං තස්සානුභාවෙන නිබ්බත්තභාවං දිස්වා විම්හිතමානසා දෙවධීතරං ආමන්තෙත්වා ත්වං කෙන කම්මෙන ඉධ නිබ්බත්තාති පුච්ඡිංසු. සා භික්ඛූ වන්දිත්වා අඤ්ජලිං පග්ගය්හ ඨිතා භන්තෙ මං න සඤ්ජානිත්ථාති ආහ. භික්ඛූහි න මයං සඤ්ජානාම භගිනීති වුත්තෙ සා අත්තනො සභාවං කථෙන්තී එවමාහ.

8. හීය්‍යො ආසනසාලාය, නිසීදිත්ථ සමාගතා;

තුම්හකං සන්තිකං ගම්ම, යා වරාකීභිවාදයි.

9. යා බොධිං පූජනත්ථාය, වත්ථකං පටිපාදයි;

සාහං හීය්‍යො චුතා ආසිං, රත්තියං බ්‍යාධිපීළිතා.

10. නානාසම්පත්තිසංයුත්තා, නානාභූසනභූසිතා;

විමානෙ රතනා කිණ්ණෙ, ජාතාහං එත්ථ කානනෙ.

11. හීය්‍යො පස්සිත්ථ මෙ ගත්තං, රජොජල්ලෙහි සංකුලං;

අජ්ජ පස්සථ මෙ ගත්තං, වණ්ණවන්තං පභස්සරං.

12. හීය්‍යො පස්සිත්ථ මෙ භන්තෙ, නිවත්ථං මලිනම්බරං;

අජ්ජ පස්සථ මෙ භන්තෙ, දිබ්බමම්බරමුත්තමං.

13. විකිණ්ණඵලිතග්ගෙහි, කෙසෙහි විරලා කුලං;

ඌකාගූථපටික්කූලං, හීය්‍යො ආසිසිරං මම.

14. අජ්ජ තං පරිවත්තිත්වා, මම පුඤ්ඤානුභාවතො;

සුනීලමුදුධම්මිල්ලං, කුසුමා භරණභූසිතං.

15. පුරා මෙ සකසීසෙන, වහිතං දාරූ දකාදිකං;

පුඤ්ඤෙනාහං අජ්ජ මාලා, භාරං සීසෙ සමුබ්බහෙ.

16. ධජත්ථාය මයා හීය්‍යො, පදින්නං ථූලසාටකං;

අජ්ජ නිබ්බත්ති මෙ භොන්තො, මහන්තං දිබ්බසම්පදං.

17. ජානමානෙන කත්තබ්බං, දානාදීසු මහප්ඵලං;

දෙවලොකෙ මනුස්සෙසු, සුඛදං දාන මුත්තමන්ති.

තං සුත්වා සබ්බෙ භික්ඛූ අච්ඡරියබ්භුතචිත්තා අහෙසුං. සා දෙවතා තස්සා රත්තියා අච්චයෙන භික්ඛූ නිමන්තෙත්වා දිබ්බෙහි ඛජ්ජභොජ්ජෙහි සහත්ථා සන්තප්පෙත්වා තෙහි සද්ධිං ආගච්ඡන්තී අන්තරාමග්ගෙ දානං දදමානා මහාබොධිං ගන්ත්වා සබ්බෙහි ධජපතාකා දීහි ච නානාවිධවණ්ණගන්ධසම්පන්නපුප්ඵෙහි ච දීපධූපෙහි ච බොධිං පූජෙත්වා භික්ඛූනං චීවරත්ථාය දිබ්බවත්ථානි දත්වා ආගම්ම තස්මිංයෙව වනසණ්ඩෙ වසන්තී නානාවිධානි පුඤ්ඤානි කත්වා තාවතිංසභවනෙ නිබ්බත්ති. භික්ඛූපි තං අච්ඡරියං තත්ථ තත්ථ පකාසෙන්තා බහූජනෙ පුඤ්ඤකම්මෙ නියොජෙසුංති.

18. එවං විධාපි කපණා ජිනසාසනම්හි,

කත්වා පසාද මථ ථූලකුචෙලකෙන;

පූජෙත්ව දිබ්බවිභවං අලභීති ඤත්වා,

පූජාපරා භවථ වත්ථුසු තීසු සම්මාති.

කපණාය වත්ථුං තතියං.