34. ඉන්දගුත්තත්ථෙරස්ස වත්ථුම්හි අයමානුපුබ්බීකථා

අම්හාකං භගවතො පරිනිබ්බාණතො ඔරභාගෙ ජම්බුදීපෙ කිර පාටලිපුත්තං නාම නගරං අහොසි. තත්ථ ධම්මාසොකො නාම මහිද්ධිකො මහානුභාවො ආණාචක්කවත්ති රාජා රජ්ජං කාරෙති. උද්ධං ආකාසතො හෙට්ඨා පථවියා යොජනප්පමාණෙ සකලජම්බූදීපෙ තස්ස ආණා පවත්තති, තදා සකලජම්බුදීපවාසිනො ච චතුරාසීති නගරසහස්සෙ රාජානො ච අත්තනො අත්තනො බලවාහනෙ ගහෙත්වා ආගම්ම ධම්මාසොකමහාරඤ්ඤො උපට්ඨානං කරොන්ති. තස්මිං සමයෙ දෙවපුත්තනගරෙ දෙවපුත්තො නාම මහාරාජා අත්තනො බලවාහනං ගහෙත්වා රඤ්ඤො උපට්ඨානං අගමාසි. ධම්මාසොකො දෙවපුත්තමහාරාජානං දිස්වා මධුරපටිසන්ථාරං කත්වා තුම්හාකං රට්ඨෙ බහුස්සුතා ආගතාගමා මහාගුණවන්තා අය්‍යා අත්ථීති පුච්ඡි. තං සුත්වා දෙවපුත්තරාජා අත්ථි දෙව තස්මිං නගරෙ සීහකුම්භකං නාම මහාවිහාරං. තත්ථ අනෙකසහස්සභික්ඛූ විහරන්ති සීලවන්තා අප්පිච්ඡා සන්තුට්ඨා විවෙකකාමිනො. තෙසු සාට්ඨකථාතිපිටකධරො ඉන්දගුත්තත්ථෙරො නාම තෙසං පාමොක්ඛො අහොසි. සො අනෙකපරියායෙන සනරාමරානං භික්ඛූනං ධම්මංවණ්ණෙති. ගුණවා අත්තනො ගුණං නිස්සාය ලොකෙ පාකටොති. තං සුත්වා රාජා තුට්ඨමානසො ථෙරං පස්සිතුකාමො හුත්වා සම්ම ත්වමෙව ගන්ත්වා ථෙරං යාචිත්වා ඉධා නෙහීති ආහ. තං සුත්වා දෙවපුත්තරාජා අත්තනො හත්ථස්සබලවාහනා දිමහා සෙනඞ්ගපරිවුතො ඉන්දගුත්තත්ථෙරස්ස සන්තිකං ගන්ත්වා වන්දිත්වා අය්‍ය අය්‍යං ධම්මාසොකමහාරාජා දට්ඨුකාමොති ආහ. ථෙරෙන සාධූති සම්පටිච්ඡිතෙ රාජා ථෙරෙන සම්පටිච්ඡිතභාවං ධම්මාසොකමහාරාජිනො පෙසෙසි. තතො ධම්මාසොකමහාරාජා සොමනස්සප්පත්තො අත්තනො ආණාපවත්තිතට්ඨානෙ රාජූනං සාසනං පෙසෙසි. සබ්බෙව ථෙරාගමනමග්ගං අලඞ්කරොන්තූති. අථ තෙ රාජානො තුට්ඨපහට්ඨා අත්තනො අත්තනො නගරෙ භෙරිං චරාපෙත්වා දෙවපුත්තනගරතො යාව පාටලිපුත්තනගරං එත්ථන්තරෙ පඤ්චපණ්ණාසයොජනිකං මග්ගං විසමං සමං කරොන්තො දෙවතානං දිබ්බවීථිමිව අලඞ්කරිත්වා ධම්මාසොකමහානරින්දස්ස එවං සාසනං පෙසෙසුං. භවන්තෙත්ථ.

1. ඉන්දගුත්තමහාථෙර, සාමිනො ගමනාය නො;

මග්ගං අලඞ්කරොන්තූති, මහාරාජෙන පෙසිතං.

2. තතො තෙ අපනෙත්වාන, පාසාණකණ්ටකාදිකං;

විසමං සමං කරිත්වාන, සම්මජ්ජිත්වාන සාධුකං.

3. ධොතමුත්තා සමාභාසා, ඔකිරිත්වාන වාලුකා;

උස්සාපිතා තත්ථ තත්ථ, දුස්සතොරණපන්තියො.

4. කලධොතහෙමරම්භාදි, නානාතොරණපන්තියො;

තථා පුප්ඵමයා නෙක, තොරණූපරිතොරණා.

5. තෙසු තෙසුච ඨානෙසු, සඞ්ඛතා කුසුමග්ඝිකා;

තථෙව ගන්ධතෙලෙහි, දීපිතා දීපපන්තියො.

6. පදුමුප්පලසන්නීර, පුප්ඵපල්ලව ලඞ්කතා;

ඨපිතා ඝටමාලායො, පුණ්ණා සොගන්ධවාරිහි.

7. නිලපීතා දිසම්භින්න, පතාකාහි ධජෙහි ච;

මග්ගස්ස උභතො පස්සෙ, වනමාසි සමාකුලං.

8. කෙතවො උග්ගතා තත්ථ, මන්දමන්දසමීරණා;

අව්හයන්තාව සොභන්ති, බ්‍රහ්මොරගසුරාදයො.

9. නාගචම්පපුන්නාග, කෙතකීවකුලාදිහි;

පදුමුප්පලා දිජලජෙහි, මාලතී කුසුමා දිහි.

10. මාලාදාමෙහි නෙකෙහි, මග්ගමාසි විචිත්තකං;

පත්ථරිත්වා පාදපටෙ, සිත්තසම්මත්තභූමියං.

11. ලාජාදිපඤ්චපුප්ඵානි, විකිරිංසු මනොරමං;

අලඞ්කරිත්වා හත්තස්සා, කුසුමා භරණාදිහි.

12. මග්ගාලඞ්කරණත්ථාය, ඨපිතාසුං තතො තතො;

තෙසු තෙසු ච ඨානෙසු, භෙරිමණ්ඩලමජ්ඣගා.

13. නච්චන්ති චාතුරා නාරී, රසභාවනිරන්තරා;

කංසවංසාදිපග්ගය්හ, වජ්ජෙන්තානෙකතන්තියො.

14. ගායන්ති මධුරං ගීතං, ගායන්තෙත්ථ ලයාන්විතං;

මග්ගොසො සාධුවාදෙහි, භෙරිතන්තිනදෙහිච.

15. කරීනං කොඤ්චනාදෙහි, හයානං හෙසිතෙහි ච;

නෙකවිටඞ්කසඞ්ඝෙහි, සො කරීහි සමාකුලො.

16. මග්ගස්ස උභතො පස්සෙ, දෙවකඤ්ඤූපමා සුභා;

මාලාකලාපෙ පග්ගය්හ, තිට්ඨන්ති තුට්ඨමානසා.

17. තථා පුණ්ණඝටෙ ගය්හ, පදුමුප්පලසංකුලෙ,

අට්ඨමඞ්ගලමුග්ගය්හ, තිට්ඨන්ති පමදා තහිං.

18. සීතලූදකසම්පන්න, පපාහි සමලඞ්කතා;

සිනානත්ථං ඛතා ආසුං, පොක්ඛරඤ්ඤො තහිංතහිං.

19. තහිංතහිංකතා ආසුං, දානසාලා මනොරමා;

නිචිතාසුමනෙකානි, දානොපකරණා තහිං.

20. එවං නෙකවිධා පූජා, අම්හෙහි පටිපාදිතා;

ඨපෙත්වාන මහාගඞ්ගං, තං ජානාතු මහීපතීති.

තං සුත්වා අසොකමහාරාජා ගඞ්ගං අලඞ්කරොථාති සොළසයක්ඛෙ පෙසෙසි, තෙ සපරිවාරා තත්ථ ගන්ත්වා අත්තනො ආනුභාවෙන ගඞ්ගාය අන්තො තිගාවුතට්ඨානෙ උදුක්ඛලපාසාණෙ ඨපෙසුං. ඨපෙත්වා ථම්භෙ උස්සාපෙත්වා තුලාසංඝාටෙ දත්වා හිමවන්තතො රත්තචන්දනසාරෙ ආහරිත්වා පදරෙ සන්ථරිත්වා අනෙකෙහි පූජාවිධානෙහි අලඞ්කරිත්වා රඤ්ඤො එවං සාසනං පෙසෙසුං. භවන්තෙත්ථ.

21. යමත්ථාය මයං සබ්බෙ, මහාරාජෙන පෙසිතා;

අම්හෙහි දානි තං සබ්බං, කතමෙව සුණොථ තං.

22. ගාවුතත්තයගම්භීරං, ගඞ්ගං යොජනවිත්ථතං;

ථම්භෙ පතිට්ඨපෙත්වාන, අනග්ඝං රත්තචන්දනං.

23. හිමවන්තතො හරිත්වාන, සෙතුං තත්ථ සුමාපිතං;

තොරණා ච උභො පස්සෙ, රතනෙහි සුනිම්මිතා.

24. පුණ්ණකුම්භද්ධජා චෙව, පදීපාවලියො තථා;

උභො පස්සෙසු රතනානි, මාපෙත්වාලම්බනානිච.

25. සුවණ්ණමණිමුත්තාදි, දාමෙහි සමලඞ්කතා;

වාලුකත්ථාය ඔකිණ්ණා, ධොතමුත්තා පභස්සරා.

26. තෙසු තෙසු ච ඨානෙසු, ඨපිතාසුං මහාමණී;

නානාරාගවිතානෙහි, සොභිතා සෙතුනො පරි.

27. ඔලම්බිතාසුං තත්ථෙව, දිබ්බාදිකුසුමාදයො;

නිට්ඨිතං ඉධ කාතබ්බ, යුත්තං පූජාවිධිංතු නො;

දෙවොතං පටිජානාතු, ඉති වත්වාන පෙසයුංති.

තම්පි සුත්වා අසොකො මහාරාජා තුම්හෙව ථෙරං ඉධානෙථාති තෙසංයෙව සාසනං පටිපෙසෙසි, තෙ සාධූති ඉන්දගුත්තත්ථෙරස්ස සන්තිකං ගන්ත්වා වන්දිත්වා භන්තෙ පාටලිපුත්තනගරස්ස ගමනාය කාලොති ආහංසු, තතො ථෙරො සට්ඨිසහස්සමත්තෙහි භික්ඛුසඞ්ඝෙහි පරිවුතො පඤ්චපණ්ණාසයොජනමග්ගං පටිපජ්ජි. අථාපරං දෙවපුත්තනගරවාසිනො අනෙකවිධමාලාගන්ධවාසචුණ්ණද්ධජපතාකාදීහි අනෙකෙහි තාලාවචරෙහි නච්චගීතවාදිතෙහි පූජෙත්වා අගමංසු. අථ ථෙරො මහන්තෙන පූජාවිධානෙන ජම්බුදීපවාසීහි පූජියමානො අනුක්කමෙන චන්දභාගාය ගඞ්ගාය සෙතුං පත්වා තත්ථ මහන්තං පූජාවිධානං ඔලොකෙන්තො එවං චින්තෙසි, එවං උළාරං පූජාවිධානං ඉදානි ජම්බුදීපෙ නාඤ්ඤස්ස හොති, මය්හමෙවෙතං කතං. අහමෙවෙත්ත උත්තමො අප්පටිමොති එවං සෙය්‍යස්ස සෙය්‍යොහමස්මීති මානං උප්පාදෙත්වා අට්ඨාසි. තස්මිං ඛණෙ එකො ඛීණාසවත්ථෙරො තං මානෙනුපත්ථද්ධචෙතසා ඨිතං දිබ්බචක්ඛුනා දිස්වා උපසඞ්කමිත්වා වන්දිත්වා ථෙරස්ස ඔවදන්තො එවමාහ. තස්මා.

28. මා මානස්ස වසී හොථ, මානො භන්තෙ වසංගතං [මානංභන්තෙවසීකතං ඉතිසබ්බත්ථ];

අනත්ථදො සදා හොති, පාතෙත්වාන භවා වටෙ.

29. මානො පලාලිතො සත්තො, තණ්හාපටිඝසඞ්ගතො;

මක්කටොරගසොණාදි, හුත්වා ජායති ජාතිසු.

30. මා මානං සාමි පූරෙහි, අත්තානං පරිසොධය;

අපරිසුද්ධා සයො භික්ඛු, දායකං න පරිතොසති.

31. දදන්තානං සරන්තානං, පූජෙන්තානං සචෙ තුවං;

මහප්ඵලං මහාභූතිං, කාමත්ථ හොථ නිබ්බණාති [නිම්මනා ඉතිකත්තචි].

තං සුත්වා ථෙරො සංසාරෙ නිබ්බින්දො තත්ථෙව ඨිතො තිලක්ඛණං පට්ඨපෙත්වා කරජකායං සම්මසන්තො සහපටි සම්භිදාහි අරහත්තං පත්වාව නික්ඛමි. තතො ධම්මාසොකමහාරාජා බලවාහනපරිවුතො මහන්තෙන පූජාවිධානෙන පටිමග්ගං ආගම්ම වන්දිත්වා තතො දිගුණං පූජාසක්කාරං කුරුමානො මහාභික්ඛුසඞ්ඝෙන සද්ධිං ථෙරං අත්තනො නගරං නෙත්වා තස්ස ධම්මකථං සුත්වා පසන්නමානසො පඤ්චසීලෙ පතිට්ඨාය මහන්තං විහාරං කාරෙත්වා ථෙරෙන සහාගතානං සට්ඨිසහස්සානං භික්ඛූනං චතුපච්චයෙහි උපට්ඨාන මකාසි, අථ ථෙරො සාට්ඨකථං පිටකත්තයං පකාසෙන්තො තස්මිං චිරං වසිත්වා තත්ථෙව පරිනිබ්බායි. තතො රාජා සපරිසො තස්ස සරීරනික්ඛෙපං කාරෙත්වා ධාතුයො ගහෙත්වා මහන්තං චෙතියං කාරාපෙසීති.

32. පුරාතනානං භුවි පුඤ්ඤකම්මිනං,

ගුණානුභාවෙන මහෙන්ති එවං;

සදෙවකා නං මනසීකරොන්තා,

පුඤ්ඤං කරොථා යතනෙ සදා දරාති.

ඉන්දගුත්තත්ථෙරස්ස වත්ථුං චතුත්ථං.