9. ඡත්තුපාහනවග්ග, 12. ද්වාදසම සික්ඛාපුච්ඡා

පුච්ඡා – අනොකාසකතං ආවුසො භික්ඛුං පඤ්හං පුච්ඡන්තියා පාචිත්තියං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලා භික්ඛුනියො ආරබ්භ පඤ්ඤත්තං, සම්බහුලා භන්තෙ භික්ඛුනියො අනොකාසකතං භික්ඛුං පඤ්හං පුච්ඡිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සප්පිං වා ආවුසො තෙලං වා මධුං වා ඵාණිතං වා මච්ඡං වා මංසං වා ඛීරං වා දධිං වා විඤ්ඤාපෙත්වා භුඤ්ජන්තියා පාටිදෙසනීයං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියා භික්ඛුනියො ආරබ්භ පඤ්ඤත්තං, ඡබ්බග්ගියා භන්තෙ භික්ඛුනියො සප්පිම්පි තෙලම්පි මධුම්පි ඵාණිතම්පි මච්ඡම්පි මංසම්පි ඛීරම්පි දධිම්පි විඤ්ඤාපෙත්වා භුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – චතුන්නං ආවුසො විපත්තීනං කතමා විපත්ති.

විස්සජ්ජනා – ආචාරවිපත්ති භන්තෙ.

පුච්ඡා – ඡන්නං ආවුසො ආපත්තිසමුට්ඨානානං කතිහි සමුට්ඨානෙහි සමුට්ඨාති.

විස්සජ්ජනා – චතූහි භන්තෙ සමුට්ඨානෙහි සමුට්ඨාති, සියා කායතො සමුට්ඨාති, නවාචතො නචිත්තතො, සියා කායතො ච වාචතො ච සමුට්ඨාති, නචිත්තතො, සියා කායතො ච චිත්තතො ච සමුට්ඨාති, නවාචතො, සියා කායතො ච වාචතො ච චිත්තතො ච සමුට්ඨාති, ඉමෙහි භන්තෙ චතූහි සමුට්ඨානෙහි සමුට්ඨාති.

පුච්ඡා – කා ආවුසො විපත්ති.

විස්සජ්ජනා – අසංවරො භන්තෙ විපත්ති.

පුච්ඡා – කා ආවුසො සම්පත්ති.

විස්සජ්ජනා – සංවරො භන්තෙ සම්පත්ති.

පුච්ඡා – කා ආවුසො පටිපත්ති.

විස්සජ්ජනා – න එවරූපං කරිස්සාමීති යාවජීවං ආපාණකොටිකං සමාදාය සික්ඛති සික්ඛාපදෙසු, අයං භන්තෙ පටිපත්ති.

පුච්ඡා – කස්ස ආවුසො වචනං.

විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.

පුච්ඡා – කෙනාවුසො ආභතං.

විස්සජ්ජනා – පරම්පරාය භන්තෙ ආභතං.

සුණාතු මෙ භන්තෙ සඞ්ඝො…පෙ… සංගායෙය්‍යාම.