4. භොජනවග්ග, 4. කාණමාතු සික්ඛාපුච්ඡා

පුච්ඡා – ද්වත්තිපත්තපූරං පූවං පටිග්ගහෙත්වා තතුත්තරි පටිග්ගණ්හන්තස්ස පාචිත්තියං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ න මත්තං ජානිත්වා පූවං පටිග්ගහෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කස්ස ආවුසො වචනං.

විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.

පුච්ඡා – කෙනාවුසො ආභතං.

විස්සජ්ජනා – පරම්පරාය භන්තෙ ආභතං.

පුච්ඡා – අත්ථි නුඛො ආවුසො එත්ථ කොචිපි විරද්ධදොසො.

විස්සජ්ජනා – නත්ථි භන්තෙ.